Адхілены ад працы кіраўнік школы ў Печах знаходзіцца на працоўным месцы

Адхілены ад працы кіраўнік школы ў Печах знаходзіцца на працоўным месцы

Прэс-служба Міністэрства абароны паведаміла, што ў вайсковай часці, дзе загінуў салдат Аляксандр Коржыч, адхіленыя ад працы пяць службовых асобаў, яшчэ чатыры чалавекі звольненыя.

“Адхілены ў тым ліку і камандзір адпаведнай вайсковай часці, дзе праходзіў службу адпаведны вайсковец, — кажа начальнік упраўлення інфармацыі Міністэрства абароны Уладзімір Макараў. — Гэта апроч следчых дзеянняў. Бо канчатковая прававая ацэнка будзе дазеная па выніках следчых дзеянняў, якія цяпер праводзіць Следчы камітэт. Адпаведна, тут можа быць і крымінальны пераслед, і шмат чаго яшчэ. А пакуль ваеннае ведамства прыняло свае меры, зходзячы з таго, што кожны камандзір адказвае за выкананне статутнага парадку ў часці”.

Іншых пакараных Уладзімір Макараў назваць адмовіўся. Мяркуючы па сайце Міністэрства абароны, дзе ёсць асобная старонка 72-га Аб’яднанага навучальнага цэнтра ў Печах, ніводзін з пяці кіраўнікоў навучальнага цэнтра не змяніўся.

Скрын з сайта Мінабароны

Там жа кіраўніком 3-й гвардзейскай школы пазначаны падпалкоўнік Аляксандр Чарноў, пра яго адхіленне ад працы на сайце таксама нічога не напісана. Еўрарадыё паспрабавала звязацца з камандзірам і… на дзіва, ён аказаўся на працоўным месцы.

“Уся інфармацыя на гэты конт знаходзіцца ў СМІ, я нічога каментаваць не буду”, — кажа падпалкоўнік Аялксандр Чарноў.

Еўрарадыё: У СМІ паведамілі, што ад працы адхілены кіраўнік школы, дзе служыў Алякасандр Коржыч. Вы ўзначальваеце 3-ю гвардзейскую школу?

Аялксандр Чарноў: Узначальваю.

Еўрарадыё: То бок паведамленне пра ваша адхіленне ад працы — лухта?

Аялксандр Чарноў: Чаму лухта? Я адхілены да канца разбіральніцтва па справе. Пасля будзе прымацца рашэнне…

Але што ён робіць на працы і чаму адказвае па працоўным нумары, часова адхілены кіраўнік 3-й гвардзейскай школы 72-га Аб’яднанага навучальнага цэнтра ў Печах паведаміць адмовіўся.

Нагадаем, Аляксандра Коржыча знайшлі павешаным 3 кастрычніка ў вайсковай часці пад Барысавым, дзе ён праходзіў тэрміновую службу. Паводле першапачатковай афіцыйнай версіі, ён здзейсніў суіцыд. Па факце гібелі салдата была распачатая крымінальная справа, затрыманыя прапаршчык і два сяржанты той вайсковай часткі.

Тым часам у інтэрнэце працягваецца збор подпісаў за адстаўку міністра абароны Андрэя Раўкова. Пасля блакіроўкі сайта Zvarot.by, дзе было сабрана каля 11 тысяч подпісаў, кампанія перамясцілася на сайт petitions.by.

Апошнія навіны

Галоўнае

Выбар рэдакцыі