Кошт бяспошлінных пасылак вырасце амаль удвая
Паштавікі гавораць, што гэта можа павялічыць час, за які пасылкі будуць даходзіць да беларусаў.
“120 еўра. Раз на месяц. На такую суму можна без пошліны атрымаць пасылкі”, — гавораць мне ў даведцы “Белпошты”.
Усё даражэйшае — толькі з мытным афармленнем. Не дзіва, што шмат хто набывае тавары на “Амазоне” і яго шматлікіх кітайскіх аналагах праз знаёмых у Вільні і Кіеве. Танней і хутчэй выходзіць.
Але вось цуд — праз тры месяцы сума, на якую можна будзе раз на месяц набываць нешта за мяжой з дастаўкай у Беларусь па пошце, вырасце амаль удвая. Кіраўнік краіны ўжо падпісаў адпаведны ўказ.
“У адпаведнасці з указам, да 200 еўра павялічваецца норма бяспошліннага ўвозу тавараў для асабістага карыстання ў міжнародных паштовых адпраўленнях і ў адпраўцы экспрэс-дастаўкі, агульная вага якіх не перавышае 31 кг”, — паведамляюць у прэс-службе кіраўніка краіны.
Указ №360 уступае ў сілу праз тры месяцы пасля падпісання. Гэта значыць, у канцы кастрычніка. Навіна ўжо ўскалыхнула інтэрнэт-форумы. Асабліва радыя аматары кітайскага інтэрнэт-шопінгу. Нядзіўна. На адным з папулярных сайтаў усяго за пяць хвілін на суму ў 200 еўра “апранаюся” з ног да галавы. Красоўкі за 20, штаны за 40. Кашуля, цішотка, гара шкарпэтак, шорты — на усё гэта “трачу” яшчэ 100 еўра. Дваццатка застаецца на гадзіннік. Якасць тавару такая ж, як у беларускіх крамах, пішуць пастаянныя кліенты на форумах крамаў: “Той самы Кітай паўсюль, толькі ў інтэрнэце нашмат танней”.
Усю гэтую вопратку можна набыць прыкладна на 200 еўра на сайце кітайскай анлайн-крамы.
Што танней — цяжка не пагадзіцца. Але нашмат марудней. У адным са сталічных паштовых аддзяленняў Еўрарадыё расказваюць, што цяпер пасылкі на мытні затрымліваюцца ў сярэднім на 15-20 дзён.
“Пакуль не пройдзе мытню. Калі пасылка пройдзе мытню, то мы вам яе выдадзім. Апрацоўвацца яна будзе тыдні 2-3”.
Пасля мытні рэчы яшчэ чакаюць гаспадароў на пошце — супрацоўнікаў часта не хапае для своечасовага і хуткага разбору патоку пасылак з Кітая. Што будзе ў канцы восені, паштавікі пакуль не ведаюць. Відавочна, што колькасць міжнародных пасылак толькі вырасце, а чакаць іх беларусам давядзецца даўжэй.