120217 Eurafokus.mp3

Былі ўзгаданыя справаздачы міжнародных праваабарончых арганізацый, з якіх вынікае, што расследаванне справы аб выбуху ў мінскім метро праходзіла з парушэннем правоў чалавека. Еўрадэпутат Вінцас Палецкіс заклікаў беларускія ўлады адмяніць прысуд Канавалаву і Кавалёву і правесці новае расследаванне справы.

 

Палецкіс: “Нават пацярпелыя не вераць у справядлівасць працэсу і прадстаўленыя доказы. Большасць жыхароў Беларусі са смяротнымі прысудамі не згодныя. Справа паказвае, што гэта не правасуддзе, а проста маніпуляцыя. Калі ўлады прывядуць прысуды меркаваных тэрарыстаў у выкананне, то гэта толькі павялічыць падазрэнні, што яны хаваюць рэальныя сляды злачынства”.

 

У святле прыгавору, вынесенага Канавалаву і Кавалёву Еўрапарламент заклікаў улады Беларусі да аб'яўлення мараторыя на смяротнае пакаранне. Беларусь застаецца адзінай краінай Еўропы, дзе дагэтуль існуе пакаранне смерцю. Гаворыць Еўрадэпутат Яцэк Пратасевіч.

 

Пратасевіч: “Мы заклікаем беларускія ўлады адмяніць у краіне смяротнае пакаранне і аб’явіць на яго мараторый”.

 

У сваю чаргу еўрадэпутат Марэк Мігальскі лічыць, што беларусы самі павінны вырашаць, ліквідаваць смяротнае пакаранне ці пакінуць яго, аднак самае горшае ў гэтай сітуацыі, што беларускія ўлады выкарыстоўваюць пакаранне смерцю як адзін з інструментаў запалохвання людзей.Свежы прыклад – справа Канавалава і Кавалёва.

 

Мігальскі: “Мы не можам быць упэўненымі на сто адсоткаў, хто вінаваты, а хто мае рацыю ў справе меркаваных тэрарыстаў, аднак мы сустракаліся з маці аднаго з асуджаных, якая распавяла, што прызнанні ад падазроных выбівалі праз катаванні". 

 

Акрамя таго, у рэзалюцыі ўтрымліваецца патрабаванне неадкладна вызваліць усіх палітзняволеных. Марэк Мігальскі кажа, што ў Еўропе ніколі не забываюцца пра беларускіх палітвязняў.

 

Мігальскі: “Нягледзячы на тое, што рэзалюцыя больш тычылася справы Канавалава і Кавалёва, мы не абышлі ўвагай і тэму палітвязняў. Для мяне асабіста вельмі важна, каб у рэзалюцыі прыгадвалася імя Змітра Бандарэнкі, якога я ўзяў пад сваю апеку”.

Рэзалюцыю, прынятую ў чацвер Еўрапарламентам, пракаментаваў палітолаг, эксперт Цэнтра еўрапейскіх даследаванняў Андрэй Фёдараў. Тое, што Беларусь не перастае знаходзіцца ў цэнтры ўвагі Еўропы, ён безумоўна лічыць пазітыўным, аднак рэзалюцыі Еўрапарламента, на жаль, малаэфектыўныя. 

 

Фёдараў: “За апошнія сямнаццаць гадоў Еўрапарламент па Беларусі прыняў больш за тры дзесяткі рэзалюцый. Гэта сведчыць аб тым, што Еўропа захоўвае інтарэс да нашай краіны. Іншая справа, што рэзалюцыі малаэфектыўныя ”.

 

Палітолаг мяркуе, што заклікі Еўрапарламента, якія змяшчаюцца ў рэзалюцыі, не будуць пачутыя беларускімі ўладамі, аднак калі б з боку Еўропы не было такой увагі, сітуацыя ў Беларусі магла б быць яшчэ горшай.

• раздрукаваць
• падзяліцца

• аудио
• текст

1 комментарии