Аўтарадыё: Калі вяшчанне адновіцца, многія супрацоўнікі могуць вярнуцца

12 студзеня 2011 рэдакцыя атрымала прадпісанне Мінсувязі аб спыненні дазволу на права выкарыстання частот. Загад аб спыненні вяшчання “Аўтарадыё” быў вынесены на падставе рашэння Рэспубліканскай камісіі па тэлебачанні і радыёвяшчанні. На ім стаяў подпіс старшыні камісіі Алега Праляскоўскага.

Міжтым, "Аўтарадыё" працягвае плаціць за частоты, выдзеленыя ім. Пакуль частоты аплочаныя да 31 сакавіка 2012 года.

Афіцыйнай прычынай пазбаўлення радыёстанцыі частот стала “невыкананне творчай канцэпцыі і распаўсюджванне інфармацыі, якая змяшчае публічныя заклікі да экстрэмісцкай дзейнасці”. Падчас выбарчай кампаніі “Аўтарадыё” пускала ў эфір ролікі з заклікам галасаваць за Уладзіміра Някляева і Андрэя Саннікава.

Нагадаем, што закрытая FM-радыёстанцыя была старэйшай незалежнай у Беларусі. Першы раз у эфіры “Аўтарадыё” з’явілася 7 жніўня 1992 году.

***

Гутарка ў эфіры Еўрарадыё з кіраўніком "Аўтарадыё" Юрыем Базаном:

120112 Bazan_site.mp3

Еўрарадыё: Як працаўнікі радыё маюцца пасля ягонага закрыцця?

Базан: Не можна сказаць, што ўсё добра, бо і краіна перажывае сур’ёзны крызіс: аб’ём працы і заробкі значна паменшалі. Тым не менш, спецыялісты, якія працавалі на “Аўтарадыё”, запатрабаваныя і могуць працаваць у іншых галінах, што маюць дачыненне з музыкай, з гукам. Гэтую сітуацыю мы неяк вытрымаем. Ніхто не галадае, але людзі засталіся без улюбёнай працы, а гэта псіхалагічна цяжка.

Еўрарадыё: А вы асабіста, як кіраўнік, як даяце сабе рады пасля закрыцця радыё?

Базан: Рэч у тым, што радыё мае дастаткова вялікі комплекс абсталявання, камп’ютарных сістэм — я спрабую знаходзіць працу з гукам, на тое, каб працягваць функцыянаванне офісу, каб радыё захавалася як юрыдычная асоба.

Еўрарадыё: Вы казалі, што не траціце надзеі на аднаўленне вяшчання. А як іншыя працаўнікі? Ці яны гатовыя вярнуцца, калі б вяшчанне аднавілася?

Базан: Не кажу за ўсіх, але думаю, што большая частка радыёстанцыі, яе “шкілет”, хутчэй за ўсё вернецца. Абы была такая магчымасць.

• аудио
• текст

БОЛЬШ ПА ГЭТАЙ ТЭМЕ

• "Аўтарадыё": Радыё "Сталіца" будзе граць на могілках
• На хвалях "Аўтарадыё" будзе вяшчаць радыё “Сталіца”
• На хвалях Аўтарадыё будзе вяшчаць радыё “Сталіца”?
• “Аўтарадыё”: Магчыма, нас закрылі, бо хтосьці захацеў нашыя частоты...
• Рашэнне наконт хвалі Аўтарадыё прынятае
• "Аўтарадыё" пакінулі ў ліку "экстрэмістаў"
• 11 траўня суд адкажа на скаргі "Аўтарадыё"