інфатэка

Рэпартажы
Пра якую “чырвоную рысу” Лукашэнка папярэдзіў амбасадараў?

Чэмпіянат свету па хакеі Тэракт у Мінску Забароненыя музыкі Лукашэнка Палата дэпутатаў Палітвязні Рэцэнзіі на альбомы Ксюша Дзягелька "Я из деревни"

Пра якую “чырвоную рысу” Лукашэнка папярэдзіў амбасадараў?

Карбалевіч лічыць, што пагрозы кіраўніка краіны былі звычайнай рыторыкай, а дэкан БДУ ўпэўнены, што да гэтай рысы мы ніколі не дойдзем.

Аўтар: Зміцер Лукашук 20.02.2012 16:55

120220 Eurafokus.mp3

Напярэдадні пасяджэння Савета міністраў краін ЕС кіраўнік Беларусі скарыстаўся магчымасцю і папярэдзіў еўрапейцаў пра небяспеку пераходу пэўнай мяжы ў пытанні санкцый.

Аляксандр Лукашэнка: “Гэтыя санкцыі, якімі вы, еўрапейцы, размахваеце перад нашым носам, вы зразумейце — мы пакуль трываем. Але калі толькі вы пераступіце чырвоную рысу, мы адкажам вельмі жорстка”. Лукашэнка: Калі толькі вы пераступіце чырвоную рысу, мы адкажам вельмі жорстка

Гэта было сказана 20 лютага, калі кіраўнік прымаў даверчыя граматы ў паслоў Аргенціны, Ізраіля, КНР, Люксембурга, Нарвегіі, Сан-Марына, Эфіопіі і Японіі, а таксама ў апостальскага нунцыя.

На думку палітолага Валерыя Карбалевіча, усе пагрозы — звычайная агрэсіўная рыторыка ў стылі Аляксандра Лукашэнкі, за якой нічога не стаіць.

Валерый Карбалевіч: “У Еўропе ўжо ўсе прызвычаіліся да такой агрэсіўнай палітыкі Лукашэнкі, і наўрад ці хто будзе звяртаць на яе ўвагу. Еўрапейскіх палітыкаў наўрад ці гэтым можна напалохаць. Калі яны не гатовыя рабіць нейкія рашучыя крокі, то не з прычыны гэтых грозных заяваў Лукашэнкі, а з прычыны больш важных прагматычных матываў — найперш, эканамічных”. Карбалевіч: Еўрапейскіх палітыкаў наўрад ці гэтым можна напалохаць

На сустрэчы кіраўніка Беларусі з амбасадарамі не было прадстаўнікоў вядучых еўрапейскіх краін. Затое быў, да прыкладу, амбасадар Кітая. Але эксперт не лічыць, што сказанае адрасавалася найперш яму. Маўляў, заявы рабіліся тады і ў прысутнасці тых, хто ў зручны момант апынуўся побач.

“Лукашэнка проста скарыстаўся момантам, каб зрабіць заяву наконт знешнепалітычнай пазіцыі нашай краіны”, — лічыць дэкан факультэта міжнародных адносінаў БДУ Віктар Шадурскі. Праўда, на тэму, што гэта за “чырвоная рыса”, якую згадаў кіраўнік краіны, і што трэба зрабіць еўрапейцам, каб яе перакрочыць, дэкан разважаць не стаў. Адзначыў толькі, што наўрад ці мы да яе хоць калі дойдзем, а не тое што — перакрочым.

Віктар Шадурскі: “Зразумела, што Беларусь зацікаўленая ў эканамічным развіцці, і тыя краіны, якія завязаныя на Беларусь, — на транзіт і гэтак далей. Таму — да чырвонай рысы яшчэ вельмі доўга. І мы яе наўрад ці дасягнем. Ды і бакі гэтага не хочуць. А спіс... Ну, спіс (неўязных у ЕС беларускіх чыноўнікаў — Еўрарадыё) існуе, ён ёсць і неяк усе навучыліся з гэтым спісам жыць”. Шадурскі: да чырвонай рысы яшчэ вельмі доўга. І мы яе наўрад ці дасягнем

Прагназаваць, ці прыслухаюцца еўрапалітыкі да слоў Лукашэнкі падчас сваёй сустрэчы 23 лютага і абмеркавання магчымага пашырэння санкцый супраць нашай краіны, эксперт не стаў. Але ўпэўнены, што яны ўважліва слухаюць усё, што кажа кіраўнік нашай краіны.

У адрозненне ад калег, палітолаг Юрый Шаўцоў ведае самае балючае месца беларускага рэжыму, ціск на якое можа стаць той чырвонай рысай, якую Лукашэнка заклікаў не пераходзіць.

Юрый Шаўцоў: “Самае горшае, што можа зрабіць Еўрапейскі саюз для Беларусі, — перакрыць экспарт беларускай нафтаперапрацоўкі ў Еўропу. Калі гэта адбудзецца, то гэта паставіць беларускую эканоміку на мяжу калапсу. І тады адзіным выйсцем для Беларусі стане рэзка ідэнтыфікаваць свае адносіны з Расіяй”.

І першымі, лічыць эксперт, пацерпяць дыппрадстаўніцтвы краін ЕС — яны могуць застацца без амбасадараў, як іх калегі з ЗША. Але ці дойдзе да гэтага, Шаўцоў прагназаваць не стаў.