120210 Kotka U Bar.mp3

 

З закрыцця гучнага бару “Малако” прайшло чатыры месяцы, а наведвальнікі да гэтага часу торгаюць ручкі закрытых дзвярэй і пытаюцца: “А дзе бар “Малако” падзеўся?”

 

А вось, падзеўся. Праект зачыніўся, месца цалкам перабудавалі, змянілі ўладальнікаў (барам зараз кіруе непасрэдна галерэя сучаснага мастацтва “Ў”) і памянялі канцэпцыю.

 

 

"Гэтае месца прыдумана людзьмі, якія вельмі любяць віно, і якім няма дзе яго піць, акрамя як на кухні дома. — расказвае Еўрарадыё Вольга Каневега-Трашко, дырэктар Ў-бара — У мінскіх барах невялікі выбар віна, і каштуе яно даволі дорага. У нас не будзе так. Будзе дэмакратычны сегмент — Іспанія, Італія за, скажам... 100 тысяч бутэлька. Гэта дазволіць сабе можа кожны беларус. І вельмі простыя закускі — сыр, мяса, хлеб, аліўкі і смачныя вялікія сэндвічі, для тых, хто вельмі галодны".

 

 

Што тычыцца арт-складнікаў, то іх ў бары будзе не так шмат, але крыху будзе:

"Мне здаецца, за сцяной хапае арта — кажа Вольга — але, як бачыце, тут ужо прадстаўленыя карціны. Яны будуць мяняцца — у галерэі даволі вялікая ўласная калекцыя. У будучым плануюцца невялікія выставы, магчыма фотавыставы. Кіно — нячаста, не ўвесь час, не як элемент забавы. Але мне падаецца, калі шмат добрага віна, сумаваць не прыйдзецца.

 

Акцэнт зразумелы — ніякіх вечарынаў. Насамрэч, галерэйшчыкі вельмі стаміліся ад начных тусовак і, прабачце, забруджаных прыбіральняў кожную раніцу.

"Для вечарынак, мне здаецца, хапае месцаў у Мінску, адкрылася шмат пляцовак, той жа Re:Public. Няхай там будуць вечарынкі. А тут, я думаю, не варта больш такога рабіць. Наогул не варта параўноўваць гэты бар з "Малаком", мы ніколі не паўторым яго, і не жадаем гэтага".

 

Ў-бар будзе адчынены з 12:00 да 24:00, там будзе віно, інтэрнэт, кава з гарбатай і лёгкія закускі. Адкрыцця з дэгустацыяй віна не прадугледжана, бар проста “адчыніць дзверы, і пачне працаваць”.

 

• раздрукаваць
• падзяліцца

• текст
• фото