фанатэка

Рэпартаж
Ціхановіч: Рашэнне наконт Еўрабачання “прымалася зверху”

Ціхановіч: Рашэнне наконт Еўрабачання “прымалася зверху”

Сёлета адборам на еўрапейскі песенны конкурс зноў будуць займацца Ціхановіч і БТ, а прадстаўніка Беларусі выберуць на "Еўрафэсце".

Аўтар: Ілля Маліноўскі 18.10.2011 13:58

111018 Malina Eurovidenie.mp3

Апошнія два гады выбарам прадстаўніка нашай краіны на "Еўрабачанні" займаўся тэлеканал АНТ. Артыстаў вызначалі закрытым галасаваннем з невядомага спісу музыкаў. Але ні Анастасія Віннікава, ні гурт "3+2", якія былі абраныя менавіта такім чынам, не здолелі дасягнуць чаканага выніку. "3+2" набралі толькі 18 балаў і аказаліся на 24-м месцы з 25-ці, а Віннікава ўвогуле не прайшла ў фінал. Пасля двух няўдалых гадоў Еўрабачанне вярнулі тэлеканалу БТ, у якога за тыя ж няўдачы некалі і забралі.

"Рашэнне прымалася зверху, відаць адбор "Еўрафэста" быў больш дэмакратычным", – мяркуе Аляксандр Ціхановіч і дадае, што сачыў за тым, як адбываўся адбор мінулыя гады, аналізаваў, шукаў памылкі. Але ў выніку ў арганізацыйных момантах "Еўрафэсту" зменаў не плануе.

Аляксандр Ціхановіч: "Думаю, што тычыцца арганізацыі і правядзення адбору, то новага там нічога не будзе, проста будуць крыху іншымі тэрміны. Я маю на ўвазе прыём заявак і правядзенне фіналу. А што тычыцца падрыхтоўкі артыста – улічым усе свае мінулыя недахопы і будзем рабіць так, каб было лепш. Каманда дакладна будзе міжнароднай, можаце ў гэтым не сумнявацца. Час пакажа, хто нам будзе неабходны, будзем глядзець".

Заяўкі на ўдзел у "Еўрафэсце" будуць прымацца з 5 па 25 лістапада. Як і раней усё будзе праходзіць у тры этапы.

Аляксандр Ціхановіч: "Паўфінал, фінал, як звычайна, і першае праслухоўванне для паўфіналу. Будзе і галасаванне тэлегледачоў, і журы. Магчыма, пазней будуць нейкія змены, але пакуль усё, як і на "Еўрабачанні" журы і тэлегледачы. Журы будзе складацца, як таго патрабуе "Еўрапейскі вяшчальны саюз", з прафесійных музыкаў ды выканаўцаў".

Уся інфармацыя пра правядзенне адбору на "Еўрабачанне-2012" днямі з'явіцца на сайце Белтэлерадыёкампаніі www.tvr.by. А сам міжнародны песенны конкурс пройдзе 22 - 26 траўня ў сталіцы Азербайджана Баку.