У Мінску пройдзе першая альтэрнатыва "Рок-каранацыі"

111013 Malina Ked.mp3

15 кастрычніка ў сталічным клубе "Цэнтр" пройдзе першая ўрачыстая цырымонія ўзнагароджання рок-музыкаў "У кедах". Гэта будзе васьмігадзінны марафон, падчас якога выступіць 15, сярод іх Addis Abeba, Botanic Project, J-J Bingz, No Comment band, The Fraiz, Жнюв, Не Прислоняться the band, МутнаеВока, Разбитае Сэрца Пацана і іншыя. Усе гэтыя каманды атрымаюць статуэтку "Залаты кед", як самыя папулярныя беларускія рок-гурты.

"Хадзілі людзі па горадзе, па ўніверсітэтах і пыталіся ў людзей у нефармальнай вопратцы, якія альтэрнатыўныя гурты тыя слухаюць, – распавядае арганізатар мерапрыемства Святлана Рамонка. – Быў складзены спіс гуртоў. Пасля гэтага праводзілася апытанне сярод нямэтавай аўдыторыі – гэта былі і бабулі, і дзядулі, і прадаўшчыцы ў крамах, і школьная моладзь. Яны выбіралі гурты з гэтага спісу. І ў выніку быў складзены спіс гуртоў, якія на слыху нават у тых, хто такую музыку не слухае".

Падчас мерапрыемства ўсе гэтыя калектывы будуць змагацца за два галоўныя прызы – запіс песні і здымкі кліпа. Абіраць гурт, які на халяву запіша трэк, будзе прафесійнае журы, сябрамі якога стануць "генералы айчыннага року". Праўда, Святлана пакуль назвала толькі Аляксандра Кулінковіча, спаслаўшыся на магчымыя форс-мажоры, а адпаведна і змены ў складзе. Кліп здыме каманда, за якую прагаласуюць наведвальнікі цырымоніі.

Святлана Рамонка: "На кожным уваходным білеце ёсць адрыўны квіточак, на якім напісана: "адзін голас". На іншым баку квіточка будзе спіс музыкаў і кожны чалавек пазначыць улюбёны калектыў. Адпаведна, гэта будзе ўлічвацца, як голас. І будзе стаяць скрыня для галасавання, куды гэты голас будзе кідацца".

Уся цырымонія працягнецца аж восем гадзін. За гэты час на сцэне выступяць усе 15 гуртоў-удзельнікаў, будзе выкананы гімн узнагароды, нейкі таямнічы сюрпрыз ды выступы трох запрошаных гасцей.

Святлана Рамонка: "Запрошаныя госці – гэта вельмі малады гурт Freemans, але маладым у нас паўсюль дарога, таму мы іх і запрасілі, тым больш, вельмі таленавітыя хлопцы. Потым старыя, добрыя Happy Face, якія прачнуліся пасля дзесяцігадовай спячкі. Ну, а хэдлайнерамі быў абраны гурт IQ48. Плюс яшчэ гімн узнагароды, які нам напісаў малады кампазітар Яўген Грачаны, і ён сам будзе яго выконваць. Гімн атрымаўся ў такім класічным хард-рокавым стылі".

Першапачаткова планавалася дадаць цырымоніі лішняга пафасу і пакласці перад клубам чырвоную дывановую дарожку, каб музыкі маглі прайсціся па ёй пад віск фанатак. Але ўлічваючы, што клуб "Цэнтр" знаходзіцца ў Палацы Рэспублікі, расцягнуць дываны на Кастрычніцкай плошчы забаранілі. Нягледзячы на гэта, арганізатары абяцаюць, што паспрабуюць зладзіць такі праход у самім клубе.

Нагадаем, цырымонія "У кедах" пройдзе ў бліжэйшую суботу ў клубе "Цэнтр", які размешчаны ў Палацы Рэспублікі. Пачнецца мерапрыемства а 15-й гадзіне. Уваход каштуе ад 30 да 40 тысяч рублёў.

Апошнія навіны

Галоўнае

Выбар рэдакцыі