фанатэка

Рэпартаж
Вольскі вяртаў грошы за адменены канцэрт, а людзі… вярталі іх Вольскаму

Вольскі вяртаў грошы за адменены канцэрт, а людзі… вярталі іх Вольскаму

У знак салідарнасці фэны “забароненай” "Крамбамбулі" адмаўляліся ад грошай за квіткі, а лідар гурта распавёў пра магчымы суд з клубам і запыты да сілавікоў.

Аўтар: Ілля Маліноўскі 13.02.2012 14:26

120213 Malina Krambambulia.mp3

11 лютага музыкі гурта "Крамбамбуля" пад сценамі клуба Re:Public вярнулі грошы прыхільнікам за адменены канцэрт і раздалі аўтографы. Ужо з першых хвілін на імправізаванай акцыі сабралася каля паўсотні чалавек. Людзі выстраіліся ў чаргу, але ад грошай многія вырашылі адмовіцца і прапанавалі іх назад Лявону Вольскаму ці арганізатару канцэрта Уладзіміру Шаблінскаму. Маўляў, гэта ў знак салідарнасці, бо “музыкі ў адмене выступу не вінаватыя”.

"Гэта справа, як мінімум, не толькі музыкаў, – кажа малады хлопец у акулярах, які спрабаваў аддаць грошы музыкам. – Кожная такая адмена канцэрту з'яўляецца для мяне, у тым ліку, і абразай, не кажучы пра тое, што псуе настрой. Увогуле, проста не дазваляе мне жыць нармальным культурным жыццём".

Ад грошай Вольскі адмовіўся і прапанаваў сваім прыхільнікам набыць за іх квіткі на канцэрт у Вільні, які адбудзецца 21 красавіка. Дарэчы, адмыслова да мерапрыемства музыкі дамовіліся, што літоўская амбасада дапаможа з бясплатнымі аднаразовымі візамі для прыхільнікаў “Крамбамбулі”.

Бліжэй да 20-й гадзіны да Re:Public пачалі падцягвацца людзі, якія прыйшлі на канцэрт-замену – салянку гуртоў Akute, Yellow Brick Road, "Петля пристрастия" ды Дзімы Ску. Шмат хто з іх спыняўся каля машын з афішамі "Крамбамбулі", спрабуючы зразумець, што тут адбываецца. Некаторыя, нават, карыстаючыся магчымасцю, бралі аўтограф у Вольскага. А некалькі чалавек здалі квіток на "Крамбамбулю" і атрыманыя грошы аддалі ў касу Re:Public.

"Ну, я слухаю не толькі "Крамбамбулю", - тлумачыць прывабная дзяўчына ўжо ў сценах клуба. - Для мяне ёсць розныя гурты, якія я люблю. Адны з іх – гэта "Akute" і "Петля пристрастия". Таму я і прыйшла сёння".

Дарэчы, на канцэрт Вольскага і кампаніі ў Вільні дзяўчына таксама абавязкова паедзе. Праўда, квіток пакуль не набывала.

Увесь час пакуль "крамбамбулеўцы" вярталі грошы прыхільнікам, яны чакалі, што да іх выйдзе дырэктар клуба Re:Public Андрэй Старцаў. Але гэтага так і не здарылася, а самі яны ў памяшканне вырашылі не заходзіць, нават пагрэцца.

"Мы даслалі запыты ў розныя арганізацыі, сілавыя ды не толькі, – распавядае пра працяг канфлікту з клубам Лявон Вольскі. – Каб там нам патлумачылі наша становішча. Наконт таго, ці існуюць у нас чорныя спісы, і, калі існуюць, ці ўваходзіць туды "Крамбамбуля". Баюся, што яны паўнавартасна нічога не растлумачаць, але нешта напішуць. Хутчэй за ўсё, нам таксама давядзецца заводзіць судовы працэс з клубам, бо кіраўніцтва клуба не пайшло з намі ні на які дыялог, што дзіўна. Таму ў нас ёсць нагода гэта зрабіць. А калі мы не пачнём гэтую юрыдычную справу, то мы пакажам, што гатовыя вытрымаць усё што хочаш".

Тым часам, а 20-й гадзіне ў клубе пачаўся канцэрт "Танцы-Шманцы-2". Першым на сцэну выйшаў Дзіма Ску і без згадак пра "Крамбамбулю" пачаў свой выступ.

У выніку, толькі музыкі Akute ды Yellow Brick Road падчас выступу сціпленька выказалі словы салідарнасці з забароненымі гуртамі. А ў гэты час каля 100 чалавек атрымлівалі грошы за квіткі перад уваходам у клуб. Вельмі шмат людзей не здолелі прыехаць на сустрэчу, яны ўвесь час тэлефанавалі арганізатару Ўладзіміру Шаблінскаму і дамаўляліся на іншы дзень і час.