Асудзілі яшчэ аднаго жыхара Жлобіна за ўдзел у пратэстах 2020-га
Аляксей Аўдзееў / t.me/viasna96/
Асудзілі яшчэ аднаго жыхара Жлобіна за ўдзел у пратэстах 2020-га. Аляксей Аўдзееў атрымаў 2,5 года калоніі агульнага рэжыму, пішуць праваабаронцы.
Справу разглядаў суд Жлобінскага раёна (суддзя — Святлана Рубахава). Аўдзеева прызналі вінаватым у "арганізацыі і падрыхтоўцы дзеянняў, якія груба парушаюць грамадскі парадак, альбо актыўным удзеле ў іх".
Практыка вынясення судовых пакаранняў па гэтым артыкуле палягае ў тым, што большасць асуджаных у Жлобіне атрымлівалі абмежаванне волі без накіравання ва ўстановы адкрытага тыпу. Аднак да справы Аляксея Аўдзеева паставіліся вельмі жорстка. Мяркуецца, што прысуд — помста за ўдзел 9 жніўня 2020 года ў мірнай акціі пратэсту супраць фальсіфікацыі вынікаў прэзідэнцкіх выбараў і працу ў стачкаме на БМЗ.
Аўдзееў за кратамі са жніўня 2023-га.
Сёлета ў Жлобіне за ўдзел у пратэстах 2020-га судзілі вайскоўцаў.
