Бацька загінулай “на бульбе” школьніцы: Мяркую, на поле вучняў ужо не адправяць
Мінскі абласны суд не прызнаў, што загінулая “на бульбе” Вікторыя Папчэня знаходзілася на працы. Бацька дзяўчынкі Алег Папчэня ўжо некалькі месяцаў дамагаецца, каб прызналі факт працоўных адносінаў паміж яго дачкой і калгасам.
Навошта гэта трэба і да чаго прывяло, абмяркоўваем у студыі Еўрарадыё з Алегам Папчэнем, прававым інспектарам прафсаюза РЭП Леанідам Судаленкам і прадстаўніком прафсаюза на судзе Андрэем Стрыжаком.
Прапануем лепшыя цытаты з размовы:
Пра важнасць гэтых судовых працэсаў
Алег Папчэня: “Ніхто не хацеў браць на сябе віну. Таму я хацеў даказаць праз суд. Але праз нашы суды гэта не атрымалася. Мне здаецца, я маю рацыю. Але бачна, што простых людзей не слухаюць”.
Леанід Судаленка: "Мы не выйгралі справу, на жаль. Судовая сістэма сказала, што школьнікаў і надалей можна прыцягваць да такіх прац, адрываць ад вучэбнага працэсу. Спярша пракуратура нас падтрымала, а сёння – не”.
Пра вынік судоў:
Алег Папчэня: “Я думаю, больш такога не будзе. Каб школьнікаў прыцягвалі да працы, каб іх нешта прымушалі рабіць, а яны ў гэты час нават не ведалі, працуюць яны ці вучацца”.
Леанід Судаленка: “Гэты час патрацілі не дарма. Ішоў вялікі розгалас ад гэтага. Хацелася б, каб з наступнага году ніводзін школьнік не адрываўся ад вучобы”.
Андрэй Стрыжак: “Падчас працэсу ўскрылася праблема, якая існуе з прыцягненнем дзяцей да сельскагаспадарчых працаў. Існуе канфлікт паміж Міністэрствам адукацыі і яго структурнымі падраздзяленнямі”.
Пра канфлікт паміж чыноўнікамі
Андрэй Стрыжак: “Загад выканкама больш важны для аддзелаў адукацыі, чым слова Мінадукацыі. Наўпрост быў праігнараваны ліст з Мінадукацыі, што немагчыма прыцягваць дзяцей да сельскагаспадарчых спраў. Ёсць ліст, які гэта забараняў”.
Пра “выхаваўчую працу” на полі
Леанід Судаленка: ”Трэба любымі шляхамі забараняць свайму дзіцяці працаваць на полі ад школы. Мы бачым да якіх вынікаў гэта прыводзіць”.
Андрэй Стрыжак: “Цяпер мы будзем маніторыць сітуацыю, а ў жніўні запытаемся ва ўсіх аддзелаў адукацыі, ці ёсць цяпер такія акцыі па прыборцы ўраджаю”.
