Беларускія кінапраекты на Berlinale 2025: хто прэзентуе свае ідэі

15 лютага 2025 года на Еўрапейскім кінарынку 75-га Берлінскага кінафестывалю прэзентуюць 10 праектаў беларускіх аўтараў. Мерапрыемства ўжо другі раз праводзіць Беларуская незалежная кінаакадэмія.

Адбор праектаў правялі Ірэна Кацяловіч і Ігар Сукманаў у супрацы з экспертамі з Фінляндыі і Італіі — Леэнай Пасанэн і Стэфана Тэальдзі.

У пітчынгу прымуць удзел дзевяць ігравых праектаў і адзін дакументальны:

• “Жнівень” (драма): Нэла Агрэніч;

• “Краіна ўцех” (драма, заснаваная на рэальных падзеях): Аляксандра С. і Міхал Мешчык;

• “Лебядзіная песня Фёдара Озерава” (драмедыя): Юрый Сямашка;

• “Lithuania Minor” (дакументальны): Арцём Лобач;

• “Суд мёртвых” (хорар, камедыя): Андрэй Кашперскі і Міхаіл Зуй;

• “Суперпазіцыя” (драма, камедыя, абсурд): Марыя Пташка;

• “Tamka 9” (драма): Улада Сянькова.

Аўтары трох праектаў ігравых фільмаў удзельнічаюць ананімна:

• “Праўда” (драма, трылер);

• “Раны і ўпрыгожванні” (фэнтэзі-барока, драма);

• “Сфагнум” (сюррэалістычная трагікамедыя).

Berlinale — адна з галоўных сусветных кінаплатформаў, удзел беларускіх аўтараў дае ім унікальную магчымасць прадставіць свае ідэі міжнароднай супольнасці.