Чэмпіёны тэставання, маючы 399 балаў, ідуць вывучаць хімію і інфарматыку

“Мне заўжды падабалася хімія, з першага году. Мне стала цікава дадаткова самой нешта знаходзіць па гэтым прадмеце. Але калі скончу, пакуль не ведаю, чым займацца”, — расказвае Еўрарадыё чэмпіёнка цэнтралізаванага тэставання Вольга Тугай, якая мае 399 балаў з 400 магчымых!

Студэнтка хімічнага факультэта рыхтавалася сама, але звярталася і да настаўнікаў, каб дапамагалі. Аднак жыццё выдатніцы — не толькі падручнікі і вучоба. Вольга любіць катацца на ровары, патусіць з сябрамі ў кавярні ці проста на вуліцы, не супраць схадзіць на канцэрт, але ў родным Мазыры іх праходзіць не шмат.

388 балаў з 400 магчымых — такі прахадны бал сёлета ў БДУ на “Міжнародным праве”, самы вялікі ў краіне. Большасць тых, хто паступіў сюды, — пераможцы рэспубліканскіх алімпіяд, якім не трэба здаваць тэсты, тлумачаць у БДУ.

Але ёсць і шчасліўчыкі — Ганна Жэлязнова з Віцебскай вобласці паступае на “сусветную эканоміку” міжнародных адносінаў, набраўшы 384 балы.

“Гэта прэстыжная спецыяльнасць, адна з лепшых. У будучыні я хачу падарожнічаць, гэта мусіць дапамагчы. Пакуль не асабліва ўяўляю сваё жыццё праз пяць гадоў. Але, канешне, хацелася б працаваць так, каб хапала на жыццё і каб праца падабалася”, — тлумачыць выдатніца. Прахадны бал на гэтай спецыяльнасці сёлета — 372.

Яшчэ адна трэндавая спецыяльнасць — праграміст. На факультэце прыкладной матэматыкі і інфарматыкі адзін з самых высокіх прахадных балаў — 366.

“У мяне 370 балаў. Я набраў 100 балаў па матэматыцы, і на факультэце 40 чалавек такіх. У мяне бацька працуе ў сферы праграмавання, і, лічыцца, дыплом БДУ — прэстыжны”, — тлумачыць Павел Касач, які паступае на прыкладную матэматыку і інфарматыку.

На гэты ж факультэт, на спецыяльнасць “інфарматыка”, ідзе чэмпіён тэставання Уладзімір Асіпчук з Пінску. Выдатнік мае 399 балаў па тэстах.

Някіслы прахадны сёлета і ў Беларускім універсітэце інфарматыкі і радыёэлектронікі: каб паступіць на “Інфарматыку і тэхналогіі праграмавання”, трэба было набраць 374 балы з 400 магчымых!

Не адсталі ад праграмістаў і стаматолагі. Каб вучыцца на дантыста ў мінскім Медуніверы, трэба мець 349 балаў з трох тэстаў і атэстата.

Нагадаем, сёлета на паступленне прэтэндавалі 74 тысячы абітурыентаў, якія змаглі здаць цэнтралізаванае тэставанне. У дзяржаўных ВНУ для іх было 76 тысяч месцаў, 30,5 тысячы — бюджэтныя.

Фота: minsk1.net