Дапамога спазняецца? Чаму яшчэ не працуе амерыканскі ленд-ліз для Украіны

Так, у сярэдзіне сакавіка Кангрэс зацвердзіў пакет дапамогі на 13,6 мільярда долараў. Выдаткаваны ён быў ужо да другой паловы красавіка — за гэтыя грошы пастаўляліся ў тым ліку гаўбіцы і дроны. Адразу пасля гэтага Белы дом запытаў у заканадаўцаў яшчэ 33 мільярды — але атрымаў больш, 40 мільярдаў. Палова гэтых грошай — на ўзбраенне, астатняе — на фінансавую і гуманітарную дапамогу.

Вылучаныя Кангрэсам Украіне сродкі не трэба будзе вяртаць: гэта бязвыплатная дапамога. Вызначаюць, што менавіта будзе пастаўлена за гэтыя грошы, Белы дом і Пентагон. Рашэнне яны прымаюць не "з галавы": на пастаяннай сувязі з амерыканскімі вайскоўцамі знаходзяцца галоўнакамандуючы ўкраінскім войскам Валерый Залужны і міністр абароны Аляксей Рэзнікаў, яны і фармуюць спісы патрэбаў.

Менавіта ў рамках гэтых пакетаў дапамогі ва Украіне з'явіліся, напрыклад, сістэмы HIMARS, а неўзабаве чакаюцца і ЗРК NASAMS.

Грошы, якія вылучаюцца цяпер, ідуць і на падрыхтоўку ўкраінскіх вайскоўцаў: напрыклад, 100 мільёнаў долараў нядаўна накіравалі на навучанне пілотаў. Магчыма, неўзабаве ЗША прымуць-такі рашэнне аб перадачы знішчальнікаў F-15 і F-16 — па якой менавіта працэдуры, пакуль невядома.

Яшчэ адно важнае адрозненне ленд-лізу ад іншых працэдур: ён не абмежаваны па суме ўзбраення, якое пастаўляецца.

Украінскі ваенны эксперт Алег Жданаў прагназуе, што ленд-ліз пачне працаваць з 1 кастрычніка. Аднак, адзначае ён, у прэзідэнта Джо Байдэна ёсць паўнамоцтвы пачаць пастаўкі ўзбраення па ім і раней. Хоць пастаўкі ўжо ідуць, іх павелічэнне, безумоўна, патрэбнае Украіне.

Як тлумачыў журналістам кіраўнік Офіса прэзідэнта Украіны Андрэй Ярмак, у Кіеве ёсць надзея, што ленд-ліз забяспечыць іх да зімы дастатковай колькасцю ўзбраення для перамогі. "Пасля зімы, калі ў расіян будзе больш часу акапацца, безумоўна, будзе цяжэй. Яны нас у гэта цягнуць. Для нас вельмі важна не даць ім такой магчымасці", — адзначыў Ярмак.