Другі сакратар ЦК БРСМ не ведае, колькі дзяржава траціць на яго арганізацыю

Другі сакратар ЦК БРСМ Сяргей Клішэвіч не ведае, які гадавы бюджэт арганізацыі на бягучы год, а таксама не можа адказаць на пытанне, колькі дзяржава летась патраціла на заробкі супрацоўнікам Саюза. Адказваючы на пытанне карэспандэнта БелаПАН, ён адзначыў, што бюджэт БРСМ фармуецца ў асноўным за кошт унёскаў, якія плаціць кожны сябра, а таксама за кошт дзяржпадтрымкі. Сваю недасведчанасць у фінансавых пытаннях ён патлумачыў тым, што адказвае за іншы кірунак дзейнасці.

30 студзеня 2014 года Аляксандр Лукашэнка падпісаў указ № 55, згодна з якім дзяржаўная падтрымка Беларускага рэспубліканскага саюза моладзі працягнутая да 2015 года.

Пры гэтым другі сакратар БРСМ адзначыў, што згодна з указам прэзідэнта ад 16 кастрычніка 2012 года № 181, работнікі студэнцкіх атрадаў вызваленыя ад уплаты 12% падатку. Гэтыя грошы застаюцца ў работніка. Але удзельнікам студатрадаў прапануюць пералічваць 4% ад заробку на закупку форменнага адзення, арганізацыі экскурсіяў і адпачынку.

У 2014 годзе сярэдні заробак у студатрадах склаў 4 мільёны рублёў. У дзейнасці студатрадаў удзельнічалі 64 тысячы чалавек, кожны з якіх заплаціў прыкладна па 160 тысяч рублёў. Такім чынам, БРСМ атрымаў ад іх болей за 10 мільярдаў рублёў.

Фота: bestvuz.by