Эрдаган прызнаў, што вінаваты або проста спачувае сям'і загінулага пілота?

Кіраўнік Расіі Уладзімір Пуцін і прэзідэнт Турцыі Рэджэп Таіп Эрдаган 29 чэрвеня праводзяць першыя тэлефонныя перамовы пасля таго, як турэцкія знішчальнікі збілі Су-24, паведамляе ТАСС.

Прэс-сакратар Крамля Дзмітрый Пяскоў таксама паведамляе, што “Пуцін выказаў спачуванні турэцкаму народу ў сувязі з жахлівым тэрактам. У Крамлі таксама спачуваюць, лічаць гэта тэрарыстычнай атакай на мірны Стамбул”.

Пуцін патэлефанаваў кіраўніку Турцыі пасля таго, як той накіраваў пасланне расійскаму боку, у якім папрасіў прабачэння за збіты самалёт.

З гэтым пасланнем звязаная кур’ёзная сітуацыя. 27 чэрвеня прэс-сакратар Крамля Дзмітрый Пяскоў заяўляе, што прэзідэнт Турцыі Рэджэп Таіп Эрдаган папрасіў прабачэння за збіты бамбардзіроўшчык Су-24. Па яго словах, у пасланні турэцкага лідара гаворыцца пра прабачэнні з нагоды інцыдэнту.

Пазней агенцтва Reuters са спасылкай на прэс-сакратара прэзідэнта Турцыі, паведамляе, што ў Турцыі не выключаюць “аказання дапамогі” родным загінулага пілота бамбардзіроўшчыка.

На наступны дзень турэцкае інфармацыйнае агенцтва Anadolu робіць заяву, што словы спачування былі адрасаваныя не Расіі, а сям’і загінулага пілота.

Увечары таго ж дня прэм’ер-міністр Турцыі Біналі Іылдырым кажа, што Турцыя не збіраецца выплачваць кампенсацыю за самалёт.

“Не, нічога такога. Мы толькі выказалі шкадаванне, адзначылі, што падзяляем іх боль”, — цытуе словы прэм’ера агенцтва Anadolu.

Той таксама дадае, што ў лісце Пуціну казалася пра шкадаванне, але не пра прабачэнні.

Прадстаўнік Эрдагана Ібрагім Калын кажа, што гаворка можа весціся толькі пра кампенсацыю сям’і загінулага пілота Су-24.

Тым часам на англамоўнай версіі сайта Крамля пераклад словаў “прабачце” з ліста Эрдагана быў зменены з “I apologize” на “Excuse us”. Выданне РБК тлумачыць, што, паводле Кембрыджскага слоўніка англійскай мовы, слова “apologize” выкарыстоўваюцца, каб папрасіць прабачэння за ўсвядомленую памылку, а “excuse” — за памылкова ўчыненае.

Нагадаем, расійскі бамбардзіроўшчык Су-24, які выконваў баявое заданне ў Сірыі, быў збіты турэцкімі знішчальнікамі 24 лістапада 2015 года. Расійскі пілот загінуў, штурману ўдалося выратавацца. Падчас аперацыі па яго ратаванні загінуў расійскі марскі пехацінец.

Тым часам СМІ паведамляюць, што ў выніку тэракту ў аэрапорце Стамбула загінула больш за 40 чалавек, больш за 140 атрымалі раненні.