Еўрасаюз і Савет Еўропы асудзілі чарговы смяротны вырак у Беларусі
Еўрапейскі Саюз і Савет Еўропы асудзілі чарговы смяротны прысуд, вынесены ўчора ў Беларусі.
З афіцыйнай заявай з гэтай нагоды выступіла прэс-сакратар Еўрапейскай службы вонкава-палітычных сувязяў Мая Качыянчыч. Яна нагадала, што Беларусь засталася апошняй краінай у Еўропе, дзе дагэтуль ужываецца смяротнае пакаранне.
"Пакаранне смерцю не служыць фактарам стрымлівання для злачынства, а любыя памылкі становяцца незваротнымі. Гэта жорсткае, бесчалавечнае і прыніжальнае пакаранне і парушэнне права на жыццё, замацаванага Сусветнай дэкларацыяй правоў чалавека", — падкрэсліла Качыянчыч. Яна чарговы раз заклікала ўвесці мараторый на ўжо вынесеныя смяротныя прысуды.
Таксама з асуджэннем смяротнага выраку ў Беларусі выступіў і Савет Еўропы. Пра гэта ў твітары напісаў прэс-сакратар Даніэль Гольтген: "Смерць — гэта не справядлівасць. Мы яшчэ раз заклікаем улады ўвесці мараторый на ўжыванне смяротнай кары як першы крок да яе скасавання".
Як распавядала Еўрарадыё, у Віцебску 30 ліпеня быў вынесены смяротны прысуд Віктару Паўлаву, які забіў дзвюх сясцёр-пенсіянерак. Ён забіў іх паленам, калі прыйшоў купіць выпіўку.
Гэта другі смяротны прысуд у Беларусі ад пачатку 2019 года.
We condemn the death sentence pronounced today by the Vitebsk Regional Court in #Belarus. Death is not justice. We reiterate our call on the authorities to impose a moratorium on the application of #deathpenalty as the first step towards its abolition.
— Daniel Holtgen (@CoESpokesperson) July 30, 2019
