Літва абяцае не абмяжоўваць выдачу праязных дакументаў беларусам без пашпартоў

Улады Літвы не плануюць мяняць працэдуру выдачы пашпартоў замежніка для беларусаў. Для атрымання гэтага дакумента неабходна абгрунтаваць, чаму чалавек не можа аформіць пашпарт на радзіме, патлумачылі "Белсату" ў Дэпартаменце міграцыі пры МУС Літвы.

Пра новыя пашпартныя абмежаванні беларускіх уладаў у Літве ведаюць. Дырэктарка Дэпартаменту міграцыі Эвеліна Гудзінскайце сцвярджае, што беларусы, як і раней, могуць афармляць пашпарты замежніка.

Па яе словах, большасць беларусаў, якія працуюць у Літве, маюць магчымасць спакойна вярнуцца і вельмі часта гэта робяць. Тым, хто пазбаўлены такой магчымасці, Літва выдае адмысловыя пашпарты для падарожжаў: "Мы асобна разглядаем кожны выпадак беларусаў, якія асцерагаюцца пераследу і не могуць ехаць у Беларусь. Калі сапраўды з аб’ектыўных прычынаў беларус не можа вярнуцца на радзіму, мы выдаём пашпарт замежніка".

Пры гэтым пашпарт замежніка могуць аформіць уладальнікі часовага або сталага ВНЖ. Беларус з літоўскім пашпартам замежніка можа свабодна вандраваць па Шэнгенскай зоне цягам максімум 90 дзён за паўгода (бо адначасова мае від на жыхарства ў Літве). Аднак пры гэтым усё адно трэба афармляць візы тых краін, куды грамадзянам Беларусі бязвізавы ўезд забаронены.

Аформіць пашпарт замежніка ў Літве — 65 еўра. Заява разглядаецца цягам пяці дзён. Пры дадатным рашэнні дакумент выдаюць цягам яшчэ 30 дзён. Паскоранай працэдуры за дадатковую аплату цяпер няма.

У Польшчы, як распавядала Еўрарадыё, таксама ёсць аналагічны дакумент для замежніка.