Медыкам з ЕС дазволяць агледзець Міхаіла Саакашвілі
Міхаіл Саакашвілі / Reuters
Грузінскія ўлады, відаць, дазволілі медыкам з Еўрасаюза сустрэцца з былым прэзідэнтам Грузіі Міхаілам Саакашвілі. Пра гэта піша журналіст "Радыё Свабода" Рыкард Юзвяк.
Дата паездкі пакуль не ўзгодненая. Але гаворка дакладна не ідзе пра перавод Саакашвілі "ў Польшчу ці куды-небудзь яшчэ", адзначыў журналіст са спасылкай на свае крыніцы.
Нагадаем, раней адвакаты Міхаіла Саакашвілі хадайнічалі аб яго вызваленні або адтэрміноўцы крымінальнага пакарання. Яны кажуць, што экс-прэзідэнт цяжка хворы. Улады Грузіі мяркуюць, што прыхільнікі экс-прэзідэнта спекулююць з нагоды стану яго здароўя. У Тбілісі сцвярджаюць, што Саакашвілі атрымлівае ўсю неабходную і своечасовую медыцынскую дапамогу.
Нагадаем, Саакашвілі быў арыштаваны ў Тбілісі восенню 2021-га пасля нелегальнага вяртання на радзіму. Саакашвілі абвінавачваюць у перавышэнні паўнамоцтваў за загад жорстка разагнаць акцыю пратэсту 7 лістапада 2007 года і незаконны пагром у офісах тэлекампаніі "Імедзі" ў той жа дзень. Яму пагражае не менш за дзевяць гадоў зняволення.
