Міністэрства сельскай гаспадаркі падарыла свой акварыум дзіцячаму дому
На пачатку студзеня Еўрарадыё апублікавала матэрыял пра тое, што Міністэрства сельскай гаспадаркі плануе закупіць корм для рыбак свайго акварыума на суму 2000 рублёў. У Міністэрстве патлумачылі, што акварыум ужо шмат гадоў стаіць у прыёмнай міністра, перажыў некалькіх кіраўнікоў ведамства і сапраўды абслугоўваецца за дзяржаўны кошт.
Як стала вядома Еўрарадыё праз дзень пасля публікацыі, чыноўнікі вырашылі падарыць свой акварыум мінскаму Дзіцячаму дому №6. "Згодна з загадам ад 12.01.2017" №10 "Аб перадачы маёмасці" акварыум бескаштоўна перададзены Дзяржаўнай установе адукацыі "Дзіцячы дом №6" горада Мінска".
"Пазванілі самі і прапанавалі нам акварыум. У студзені недзе гэта было. Мы пагадзіліся. У нас ужо быў адзін, меншы. Яны нам гэты падарылі. Вялікі, там шмат рыбак. Дзеці радуюцца. Нам і самім, дарослым, цікава. Дорага абслугоўваць? Ды не, яны ж нам і корм падарылі, дарагі нейкі, па накладных. Усё афіцыйна", ― расказалі Еўрарадыё у Дзіцячым доме №6.
