Мінскі абласны суд не прызнаў, што загінулая "на бульбе" школьніца была на працы

Мінскі абласны суд не прызнаў, што загінулая “на бульбе” Вікторыя Папчэня знаходзілася на працы. Такім чынам, рашэнне Маладзечанскага раённага суда засталося ў сіле. Бацька дзяўчынкі Алег Папчэня прасіў прызнаць, што яго дачка менавіта працавала на полі. Судовая камісія на чале з Анатолем Карповічам з гэтым не пагадзілася.

На думку прававога інспектара прафсаюза РЭП Леаніда Судаленкі, такое рашэнне дазволіць і надалей адпраўляць школьнікаў на ўборку ўраджая. Пра гэта ён распавёў у эфіры Еўрарадыё.

Леанід Судаленка: “Судовая сістэма сказала, што надалей школьнікаў можна прыцягваць да сельскагаспадарчых работ, адрываць іх ад навучальнага працэсу, і ніхто не панясе за гэта адказнасць. У першай інстанцыі пракуратура нас падтрымала. А сёння прадстаўнік абласной пракуратуры падтрымаў рашэнне суда першай інстанцыі”.

13-гадовая школьніца Вікторыя Папчэня загінула пад коламі грузавіка на полі пад Маладзечнам напрыканцы верасня 2016 года.