Мінскія ўлады падораць 2-мільённаму жыхару сталіцы кватэру

Мінскія ўлады падораць 2-мільённаму жыхару сталіцы кватэру. Пра гэта прэс-служба Мінгарвыканкама інфармуе ў Twitter. Плануецца, што шчаслівае дзіця з'явіцца на свет у канцы 2019 года (больш дакладная дата стане вядомая па выніках перапісу насельніцтва, прызначанага на восень 2019-га).

Сайт minsknews.by нагадвае, што гарадскія ўлады паабяцалі падарыць кватэру сям'і, у якой народзіцца 2-мільённае дзіця, яшчэ ў верасні 2015 года. Сёлета кіраўніцтва Мінгарвыканкама даручыла Камітэту па працы, занятасці і сацыяльнай абароне прапрацаваць механізм падліку 2-мільённага жыхара. Да гэтага далучылася Галоўнае статыстычнае ўпраўленне Мінска.