"Нават па ініцыятыве дзяцей": у Мінску створана 36 вайскова-патрыятычных клубаў
Вайскова-патрыятычны клуб "Мужнасць" у СШ №30 Мінска / Каастрычніцкае ГУУС
У Мінску створана 36 вайскова-патрыятычных клубаў, заявіла намесніца старшыні камітэта па адукацыі Мінгарвыканкама Людміла Барысенка. Чыноўніца запэўнівае, што моладзь сама ініцыюе іх з'яўленне.
"Гэта не штучна створаныя структуры. Яны адкрываюцца па ініцыятыве саміх хлопчыкаў і дзяўчынак, якім цікавая такая форма працы. У школах функцыянуюць пошукавыя атрады. Вучні прыцягваюцца да працы па пошуку зніклых на франтах вайны, краязнаўчай рабоце, аказваюць дапамогу ветэранам", — расказала Барысенка.
Па яе словах, такіх структур у сталіцы будзе больш, а ўлады такім чынам даюць дзецям "верныя арыенціры" і закладаюць "правільныя каштоўнасці".
На сакавік 2024 года ў Беларусі магло налічвацца больш за 900 вайскова-патрыятычных клубаў рознай накіраванасці. Па дадзеных маніторынгавай групы iSANS, яны з'яўляюцца ледзьве не штомесяц. Колькі дзяцей і падлеткаў уцягнуты ў іх дзейнасць насамрэч, застаецца толькі здагадвацца.
