Назарбаеў у Сочы раскрытыкаваў Лукашэнку за якасць беларускага малака
Прэзідэнт Казахстана Нурсултан Назарбаеў раскрытыкаваў Аляксандра Лукашэнку за якасць беларускага малака, якое пастаўляецца. 16 верасня ў Сочы на XII Форуме міжрэгіянальнага супрацоўніцтва Расіі і Казахстана Назарбаеў заявіў пра неабходнасць "распрацаваць новыя стандарты і патрабаванні тэхнічных рэгламентаў у частцы дакладнага прапісвання складу прадуктаў і якасці сыравіны", паведамляе БелаПАН.
Паводле слоў прэзідэнта Казахстана, "элементарна няма дакладнай мяжы паміж натуральным і адноўленым малаком". "Мы з нашым сябрам Аляксандрам Рыгоравічам спрачаемся, ён шпарыць сюды парашок, парашок разбаўляецца, прадаецца. Гэта зусім не неразведзенае малако", — сказаў Нурсултан Назарбаеў.
"Гэта малочны напой", — зрабіў рэмарку прэзідэнт Расіі Уладзімір Пуцін. "Гэта малочны напой, — працягнуў Назарбаеў, — ён на Захадзе менавіта такім і лічыцца, а прадаецца па тых жа цэнах, па якіх вырабляюць наша малако. Ён зараз моцна са мной спрачаўся б тут, вядома, але насамрэч гэта так. Нам трэба ў гэтым разабрацца. Нашы таваравытворцы кажуць: "Як жа так? Якасць нашага малака і гэтага малака зусім розная". А ў нас няма мяжы, мы самі вінаватыя ў гэтым. Павінна быць справядлівая канкурэнцыя паміж вытворцамі натуральнага і адноўленага малака".
Нагадаем, 15 верасня ў Сочы прайшла нефармальная сустрэча Лукашэнкі, Пуціна і Назарбаева. У чацвер і пятніцу там адбудзецца II Форум рэгіёнаў Беларусі і Расіі. У другі дзень форуму запланаваная сустрэча Пуціна і Лукашэнкі.
Фота: ria.ru
