Палітвязня Паўла Пяскова асудзілі яшчэ на адзін год зняволення
Палітвязня Паўла Пяскова асудзілі яшчэ на адзін год зняволення. Як паведамляюць праваабаронцы, за "злоснае непадпарадкаванне патрабаванням адміністрацыі калоніі". Новую крымінальную справу разглядаў суд Бабруйска і Бабруйскага раёна (суддзя — Павел Карцінін).
Пяскоў быў першым, хто атрымаў палітычны прысуд пасля прэзідэнцкіх выбараў 2020 года.
Маладзечанец Павел Пяскоў у верасні 2020-га быў асуджаны на 3 гады і 3 месяцы зняволення ў калоніі агульнага рэжыму за супраціў міліцыянеру "з прымяненнем гвалту". 19 чэрвеня таго года ў Маладзечне міліцыя спрабавала затрымаць удзельніка акцыі салідарнасці. Група мужчын адбівала ў амапаўцаў затрыманага. Падзея атрымала шырокі розгалас, бо ў руках аднаго з амапаўцаў быў пісталет, і ўсё гэта трапіла на відэа.
Праваабаронцы яшчэ восенню 2020 года прызналі Пяскова палітвязнем. Ён адбывае тэрмін у бабруйскай калоніі, са студзеня 2022 года перыядычна аказваецца ў ШІЗА. Па даных праваабаронцаў, па надуманых прычынах.
