Прадстаўнікі дэмплатформы і прафсаюза ЕГУ заяўляюць аб рэпрэсіях
У Еўрапейскім гуманітарным універсітэце (Вільня) пад выглядам рэформаў прайшлі рэпрэсіўныя скарачэнні.
Пра гэта гаворыцца ў адкрытай заяве дэмакратычнай платформы "За новы ЕГУ" і прафсаюза супрацоўнікаў і выкладчыкаў універсітэта. Заява была прынятая 31 ліпеня пасля азнаямлення з загадам рэктара ЕГУ Анатоля Міхайлава аб прызначэнні выкладчыкаў, якія прайшлі ўнутраны адбор.
У заяве гаворыцца, што "за бортам" універсітэта апынуцца практычна ўсе актыўныя прыхільнікі пераўтварэнняў. Так, згодна з загадам, не будзе працягнута супрацоўніцтва ЕГУ са старшынёй прафсаюза і сенатарам Аляксеем Крывалапам, яго намеснікам Канстанцінам Ткачовым, членам Савета прафсаюза і сенатарам Андрэем Ралянком. Не будзе працоўных кантрактаў і з намеснікам старшыні Сената Вольгай Шпарагай, сакратаром Сената і сябрам Савета прафсаюза Андрэем Лаўрухіным, сенатарам Максімам Жбанковым.
Канстанцін Ткачоў заявіў агенцтву БелаПАН, што працэдуры ўнутранага адбору няма ні ў Працоўным кодэксе Літвы, ні ў статуце ЕГУ. Працоўны кодэкс Літвы таксама забараняе звальняць прадстаўнікоў прафсаюза, якія займаюць выбарныя пасады, да заканчэння тэрміну паўнамоцтваў.
Канфлікт у ЕГУ паміж адміністрацыяй і сенатам ВНУ, звязаны з правядзеннем рэформы прафесарска-выкладчыцкага складу універсітэта, цягнецца з сярэдзіны студзеня 2014 года.
Фота — n-europe.eu
