Праз два пункты пропуску на мяжы з Літвой можна будзе ездзіць толькі ўдзень

У Літве плануюць абмежаваць уезд праз два пункты пропуску на мяжы з Беларуссю. Гэта "Твярачус" і "Шумскас" (з беларускага боку — "Відзы" і "Лоша").

Памежныя пераходы там будуць працаваць толькі для легкавых машын і толькі ў дзённы час сутак, расказаў парталу Delfi кіраўнік Мытнага дэпартамента Літвы Дарус Жвіронас.

Гэтыя пункты не абсталяваныя рэнтгенаўскімі апаратамі. Літоўскія мытнікі сцвярджаюць, што праз іх бесперашкодна ідзе кантрабанда цыгарэт у пустых грузавіках. Новаўвядзенне, па словах Жвіронаса, дапаможа прадухіліць як карупцыю, так і кантрабанду. Ён дадаў, што іншыя буйныя памежныя пераходы працуюць кругласутачна і праз іх можна праехаць уначы.

Закрыццё пунктаў пропуску для грузавікоў, як кажа Жвіронас, магчымае ўжо напрыканцы 2023-га.

Кіраўнік літоўскай мытні таксама расказаў, што бліжэйшыя два гады амаль на ўсіх буйных памежных пунктах і ў Клайпедскім порце пабудуюць ці абновяць рэнтгенаўскія апараты для сканавання грузаў. У гэтым Літве дапамогуць фонды Еўрасаюза.

Напярэдадні літоўскі бок паведаміў, што цыгарэтную кантрабанду з Беларусі ўдалося зменшыць у чатыры разы пасля закрыцця чыгуначнага пераходу Стасілас — Беняконі, дзе не было рэнтгенаўскага апарату для праверкі грузаў.