"Праз дзірку пралезлі" — што робяць беларусы, якім забаранілі пераезд у ЗША

— Каб злавіць дату, трэба было кожны дзень заходзіць у каляндар і спрабаваць праціснуцца ў свабоднае акенца. Калі злавілі дату — на пошту прыходзіць ліст з пацвярджэннем. У ім указваўся канкрэтны памежпераход, дата, час і месца. На самім пераходзе з намі гутарылі памежнікі, бралі ДНК і здымалі адбіткі пальцаў. 6 гадзін мы прастаялі на мяжы, нас адпусцілі — і мы паехалі ў Нью-Ёрк. На ўвесь пераезд аддалі каля 7 тысяч долараў. 

"Чакаць, калі спадзе хваля хайпу"

Ужо будучы ў Штатах, Аляксандр пачаў здымаць відэа ў "ТыкТоку" пра сваё новае жыццё. У каментарах людзі, якія таксама хацелі пераехаць у ЗША, пачалі распытваць яго аб пераездзе. І тады ён вырашыў ім дапамагаць.

— Дапамога была чыста чалавечая, ніякіх грошай я не браў. Проста тлумачыў, якія трэба сабраць дакументы для мексіканскай візы, інфармаваў людзей. Тлумачыў, што "вам трэба ехаць туды і туды", з кімсьці стэлефаноўваліся, з кімсьці перапісваліся. З некаторымі цяпер сябруем, нехта цяпер — нашы суседзі. У 2023 годзе вельмі многія сем'і напісалі мне ў "ТыкТок", і 15-20 з іх змаглі рэальна пераехаць.

Цяпер такая дарога ў ЗША, здаецца, закрытая. Трамп забараніў "CBP one", а людзі, у якіх ужо былі прызначаныя даты, засталіся ні з чым.

— Людзі да гэтага год прачакалі ў Мексіцы. Тыя, каму анулявалі запіс, наўрад ці вернуцца ў Беларусь — яны пра гэта так і пішуць. Першае, што яны будуць рабіць — гэта чакаць, калі спадзе хваля хайпу.

Калі чалавеку рэальна свеціць турма ў Беларусі, то ён ніколі туды не вернецца. Я ведаю, што шмат хто гатовы плаціць "каётам" [асобам, якія дапамагаюць мігрантам у нелегальным перасячэнні мяжы — Еўрарадыё] і пераходзіць мяжу праз плот.

Так паступіла адна сямейная пара: яны проста праз дзірку пралезлі. У ЗША іх змясцілі ў цэнтр для затрыманых. Мужчыну выпусцілі, а жанчына ўсё яшчэ там сядзіць. Неяк спрабуюць разбірацца.

Паводле Алекандра, у цэлым людзі, вядома, разумелі, куды яны едуць, і бралі з сабой вялікія сумы грошай. Але былі і тыя, каму давялося вярнуцца ў Беларусь.

— Пару месяцаў таму я кансультаваў дзвюх дзяўчынак. Атрымалася так, што адной зрабілі мексіканскую візу, а другой не — ёй давялося адкрываць мульцішэнген, які таксама дазваляе заехаць у Мексіку. Яны ляцелі праз Кубу, адпачылі там 9 дзён, а ў Мексіцы іх развярнулі назад. Праз абмежаваны бюджэт ім давялося вярнуцца ў Беларусь.

"Тое, што перад носам дзверы зачынілі — гэта жорстка"

Сам Аляксандр выступае за "здаровую міграцыю" і "адносна сумленнае" перасячэнне мяжы.

— У той жа час я разумею людзей, якія выбіраюць нелегальны спосаб, бо, па сутнасці, у іх няма выбару. Людзі выбіраюць ЗША, бо тут добра ставяцца да мігрантаў, можна адносна хутка ўстаць на ногі.

Са слоў мужчыны, з аднаго боку, ён падтрымлівае палітыку Трампа, накіраваную супраць мігрантаў, асабліва тых, праз якія на амерыканскіх вуліцах зрабілася вельмі небяспечна.