Расійскіх інспектараў не пусцілі на беларускае прадпрыемства
Прадстаўнікоў Рассельгаснагляду не пусцілі на ПУП "Аршанскі малочны камбінат вытворчы цэх Сенненскі", хаця папярэдне гэты візіт быў узгоднены. Беларускі бок паведаміў аб прыпыненні дзейнасці гэтага прадпрыемства, перадае прэс-служба расійскага ведамства.
Інспектары Рассельгаснагляду з 19 сакавіка пачалі праверку беларускіх прадпрыемстваў — пастаўшчыкоў малочнай прадукцыі на расійскі рынак. Спіс прадпрыемстваў быў загадзя ўзгоднены з беларускім бокам.
Рассельгаснагляд не пярэчыць супраць таго, што названае прадпрыемства выключылі з праграмы інспекцыі. Аднак Расія з 22 сакавіка ўводзіць часовыя абмежаванні на ўвоз у Расію прадукцыі ПУП "Аршанскі малочны камбінат вытворчы цэх Сенненскі". Забарона ўводзіцца да таго часу, пакуль яго не праверыць інспекцыя Рассельгаснагляду.
У прадукцыі гэтага прадпрыемства лабараторыі Рассельгаснагляду сёлета тройчы выяўлялі антыбактэрыяльныя прэпараты: сульфаметазін (прызначаны для лячэння гаймарыту, пнеўманіі, рожы ды інш.), а таксама альбендазола сульфон і альбендазола сульфаксід (прызначаныя для лячэння паразітаў).
