Ударыўшы ў шыю настаўніцу мінскай гімназіі, дзевяцікласнік уцёк
Шакуючы інцыдэнт здарыўся каля 8.30 раніцы 23 траўня ў мінскай гімназіі № 74. Настаўніцу рускай мовы Валянціну Уладзіміраўну закрываюць у класе і пагражаюць нажом. Усё гэта адбываецца падчас першага урока.
Першапачаткова ад вучняў гімназіі атрымліваем інфармацыю пра тое, што нападнікаў было некалькі. Педагогі пачулі шум з кабінета, і настаўнік па працоўным выхаванні пачаў ламаць дзверы. Аднак следчы камітэт афіцыйна абвяргае версію, што на жанчыну нападалі некалькі вучняў. Паведамляецца выключна пра аднаго падазраванага, які быў з настаўніцай сам насам у кабінеце. Таксама вядома, што настаўніца змагла патэлефанаваць дачцэ ўжо пасля таго, як па ёй нанеслі удары вострым прадметам.
Вучні гімазіі распавядаюць, што званок аб сканчэнні ўрока так і не далі. Абсалютна ўсіх не выпускалі з класаў. Педагога забралі на “хуткай”, падазраванага адвезлі ў міліцыю. Распачата крымінальная справа за замах на забойства.
Зразумела, што сітуацыя пацягнула за сабой шмат здагадак.
Меркаванні вучняў пра траўмаваную настаўніцу вельмі адрозніваюцца. Выпускнікі мінулага года, у якіх педагог была класным кіраўніком, называюць яе патрабавальнай, але вельмі кваліфікаванай. Некаторыя называюць яе залішне строгай.
Настаўніца рускай мовы знаходзіцца ў бальніцы. Прагнозаў аб яе стане здароўя медыкі не даюць.
“Пацярпелай нанесена некалькі раненняў, у тым ліку ў шыю — жыццёва важны орган. Таму медыкі лічаць неабходным падтрымліваць яе на спецыяльных прыладах”, — удакладняе Еўрарадыё Аляксандр Герасімаў, афіцыйны прадстаўнік упраўлення Следчага камітэта па Мінску.
Як даведалася Еўрарадыё, пацярелая — настаўнік вышэйшай катэгорыі, педагагічны стаж — 25 гадоў, вядзе платны кружок "Падрыхтоўка да ЦТ па рускай мове" і факультатыў "Практычная стылістыка рускай мовы".
