Рэальныя заробкі ў Беларусі не вырастуць — Міністэрства эканомікі
Росту рэальных даходаў не чакаецца / фота tut.by
Рэальныя заробкі ў Беларусі да канца года не вырастуць у параўнанні з 2021-м, сказаў у эфіры "Беларусь 1" намеснік міністра эканомікі Дзмітрый Ярашэвіч. Хоць ён распісаў "станоўчыя працэсы" ў эканоміцы і канкрэтна на валютным рынку, на сваіх кашальках беларусы гэтага не адчуваюць.
"Я думаю, што па выніках 2022 года зарплата будзе на ўзроўні 2021-га. Прынамсі, мы для гэтага ўсё будзем рабіць", — сказаў чыноўнік.
Ярашэвіч растлумачыў, што гаворка пра рэальнае выражэнне і пакупніцкую здольнасць грамадзян з улікам высокай інфляцыі.
Паводле апошніх дадзеных, узровень гадавой інфляцыі ў Беларусі складае 18,1%. Рост цэн абганяе павышэнне даходаў, за кошт чаго ў рэальным выражэнні заробкі беларусаў трохі зніжаюцца.
