Старшыня Дзяржкантролю пракаментаваў справу Сяргея Сацука: можа, яе і спыняць

02/04/2020 - 13:12

Старшыня Камітэта дзяржкантролю Леанід Анфімаў у кулуарах пасяджэння Палаты прадстаўнікоў пракаментаваў журналістам справу рэдактара "Ежедневника" Сяргея Сацука.

Журналіста затрымалі 25 сакавіка супрацоўнікі Дэпартамента фінансавых расследаванняў КДК. Сацука, вядомага журналісцкімі расследаваннямі, вінавацяць у атрыманні хабару ў 5000 долараў. У паведамленні КДК Сацук названы ўладальнікам ТДА "Інтэр Сміт" (якому належыць выданне "Ежедневник"), а не рэдактарам, якім ён з'яўляецца. Як службовая асоба ён, па звестках КДК, атрымаў грошы за напісанне замоўленага матэрыялу.

Каментуючы гэтыя словы, Анфімаў заявіў, што Сацук з'яўляецца фактычным уладальнікам "Інтэр Сміт". "Калі ёсць доказы, што хтосьці з'яўляецца ўладальнікам фактычным, і гэта можна даказаць. І гэта што, так важна?" — прыводзіць TUT.by рэакцыю чыноўніка на здзіўленыя пытанні журналістаў.

У Анфімава спытался, ці можна казаць пра хабар, калі грошы атрымліваў журналіст, а не службовая асоба. Магчыма, у такім разе трэба кваліфікаваць гэтыя грошы неяк іначай. "Калі вы лічыце, што гэта няправільна кваліфікаваная, то следчыя органы, калі справа будзе перададзеная, можа быць, перакваліфікуюць на іншы артыкул. А можа, наогул скажуць, што мы не маем рацыю цалкам, і спыняць гэта крымінальны пераслед. Не выключаю і такога варыянту", — заявіў старшыня КДК.

Утрыманне Сацука пад вартай чыноўнік патлумачыў тым, што журналіст мог збегчы. Тое, што ўсе краіны вакол Беларусі зачынілі свае межы, яго не пераканала: "У нас было шмат выпадкаў, калі былі і межы зачыненыя, і тым не менш падазраваныя знаходзілі шчыліны і сыходзілі з поля зроку праваахоўных органаў, пакідаючы нас з носам. Я не магу паставіць каля кожнага падазраванага, якому мяняем меру стрымання, аператыўнага супрацоўніка. Чалавек можа перашкодзіць аператыўнаму расследаванню".

Анфімаў пацвердзіў, што да 5 красавіка справа Сацука будзе перададзеная ў Следчы камітэт. Падрабязнасці справы ён раскрываць не стаў.

Пракаментаваў Анфімаў і ліст Сяргея Сацука, які той прасіў Еўрарадыё апублікаваць у выпадку свайго затрымання. У лісце журналіст выказваў здагадку, што яго могуць "замовіць" за расследаванні пра карупцыю ў сістэме аховы здароўя. Па словах Сацука, замоўцам мог выступаць генерал з сістэмы МУС, які "крышуе" хабар у сістэме закупак медпрэпаратаў і абсталявання.

"Калі б хтосьці кагосьці "крышаваў", ведаючы рэзананс вакол "справы медыкаў" і паставак медтэхнікі, даўно б гэты "крышавальнік" сядзеў", — упэўнены старшыня КДК.

Напрыканцы Анфімаў папракнуў журналістаў за тое, што няправільна асвятляюць дзейнасць КДК. "Калі я гляджу, як пішуцца замоўленыя артыкулы, часта бачу, як неаб'ектыўна асвятляецца дзейнасць дзяржаўных органаў, асабліва Камітэта дзяржаўнага кантролю, становіцца проста крыўдна. Як можа журналіст, не ведаючы сутнасці справы, усіх тонкасцяў, даваць ацэнку таму, што адбываецца ў гэтым дзяржоргане?" — абурыўся чыноўнік.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.