"Стаю толькі і плачу": медыкі падазраюць успышку COVID-19 у Капыльскім раёне

У Доктаравічах кажуць, што вірус вёску прывёз дальнабойшчык — сваяк адной з супрацоўніц школы, які вярнуўся з-за мяжы. Святлана расказвае, што да 29 сакавіка ніхто і не падазраваў пра каранавірус, хоць "у вёсцы хварэюць ужо, напэўна, месяц".

Каментаваць сітуацыю ў школе Еўрарадыё не сталі. Дырэктар сказала, што яна вельмі занятая.

Аператар машыннага даення Анжэла з Новых Доктаравічаў таксама расказвае, што ў нядзелю дактары з Мінска і Капыля хадзілі па дамах і правяралі тэмпературу ў мясцовых жыхароў.

“У нас тэмпературы не было, нам дома не гаварылі заставацца, — расказвае яна. — Сказалі, што ўсё роўна гаспадарку не будуць закрываць. Усё роўна каму-небудзь трэба кароў даіць. Мы ўсё роўна ходзім на работу. Маскі нам далі. Шмат людзей з Новых Доктаравічаў хварэюць і ляжаць у бальніцах. Каранавірус гэта ці не — ніхто не ведае, нам пра гэта не гавораць".

Паводле статыстыкі Мінздароўя, за 29 сакавіка ў Беларусі з падазрэннем на каранавірусную інфекцыю шпіталізавана 110 чалавек. У той жа час выпісана 144 чалавекі — у тым ліку і кантакты першага ўзроўню.

Разам у Беларусі, паводле афіцыйнай статыстыкі, пацверджана 152 выпадкі COVID-19. За тры дні, якія прайшлі з тых часоў, як Мінздароўя апошні раз называла лічбы, дадалося 58 пацверджаных выпадкаў. Гэта сур'ёзнае паскарэнне ў параўнанні з тым, як хвароба распаўсюджвалася перад тым, калі за кожныя два дні дадавалася ад 5 да 8 пацыентаў з каранавіруснай інфекцыяй.