У Брэсце затрымалі незалежнага журналіста Яўгена Скрабца
Гэта адбылося ўвечары 17 траўня непадалёк ад дому маладога чалавека.
Пра затрыманне Еўрарадыё распавёў праваабаронца Раман Кісляк:
"Яго чакалі ў цывільным супрацоўнікі міліцыі, як мяркуецца, з АМАПу. На аўтамабілі яго даставілі ў пастарунак для гутаркі, бо ён нібыта да некага падобны. Затрымалі і завезлі ў Ленінскі РУУС".
Ужо з пастарунку Яўген Скрабец даслаў Раману Кісляку смс-паведамленне аб тым, што на яго складаюць адміністрацыйны пратакол за дробнае хуліганства.
Зараз малады чалавек знаходзіцца ў ізалятары часовага ўтрымання. Як мяркуе Раман Кісляк, судзіць Скрабца будуць у панядзелак 19 траўня.
Нагадаем, што напрыканцы сакавіка Яўген Скрабец атрымаў афіцыйнае папярэджанне з пракуратуры Брэсцкай вобласці за супрацу з "Радыё Рацыя".
