У Чырвоным касцёле неўзабаве могуць аднавіць службы — "Хрысціянская візія"
Ксёндз Уладзіслаў Завальнюк прыбірае каля Чырвонага касцёла / chyrvony.by
Неўзабаве ў Чырвоным касцёле ў Мінску могуць аднавіцца службы, піша ТГ-канал "Хрысціянская візія" са спасылкай на некалькі незалежных адна ад адной крыніц.
Паводле неафіцыйнай інфармацыі, улады змусілі Каталіцкі касцёл аплаціць велізарны рахунак КУП "Мінская спадчына" за "амартызацыю касцёла і падаткі на карыстанне зямлёй”. Дакладная сума невядомая. Аднак улетку 2020 года ўлады заяўлялі, што каталіцкая парафія завінавацілася 156 тысяч рублёў і яшчэ 13 тысяч рублёў мусіла плаціць штомесяц.
Мяркуецца, што адной з дадатковых умоваў уладаў стала адсутнасць ксяндза Уладзіслава Завальнюка на чале парафіі. Але інфармацыя пра перамовы трымаецца ў таямніцы.
Напрыканцы верасня ў касцёле адбыўся невялікі пажар. Пасля гэтага ўлады забаранілі доступ у будынак вернікам і святарам. А потым і ўвогуле скасавалі дамову на арэнду будынка, заявіўшы пра неабходнасць "рамонтна-аднаўленчых работ".
Ксёндз Уладзіслаў Завальнюк уладкаваўся дворнікам пры касцёле, каб прыбіраць прылеглую тэрыторыю.
