У Віцебску палітвязня Андрэя Новікава асудзілі да двух з паловай гадоў калоніі

Андрэю Новікаву 50 гадоў. Ён — грамадзянін Расіі. Ураджэнец Варапаева ў Пастаўскім раёне доўгі час жыў у РФ, служыў у міліцыі, ваяваў на Каўказе (ён падпалкоўнік у адстаўцы). Новікаў вярнуўся на радзіму, стварыў сям'ю. Аднойчы ён паўдзельнічаў у стрыме Ціханоўскага (на відэа), а пасля збіраў подпісы за Святлану Ціханоўскую. Мужчыну затрымалі 6 чэрвеня і прывезлі ў Мінск у СІЗА № 1. Ён быў прызнаны палітвязнем.

У пачатку снежня 2020-га Андрэя Новікава раптоўна вывезлі на расійскую мяжу і адпусцілі з забаронай вяртацца 10 гадоў. Але ў Беларусі ў яго засталася сям'я, і ён, па звестках следства, неаднаразова вяртаўся. У красавіку 2021-га Новікава затрымалі. "Мне трэба было быць побач з сям'ёй", — казаў ён у судзе.