Уладальнік крыптаабменніка Bitok.me абвешчаны ў міжнародны вышук
За 2 гады праз сэрвіс было праведзена амаль 8 тысяч аперацый на агульную суму больш за 29 мільёнаў долараў ЗША / Ілюстрацыйнае фота pixabay.com
Уладальнік крыптаабменніка Bitok.me Уладзіслаў Кучынскі абвешчаны ў міжнародны вышук, паведамляе Следчы камітэт Беларусі. Яму інкрымінуецца ўхіленне ад выплаты падаткаў у асабліва буйным памеры (ч.3 арт. 243 КК РБ).
Па гэтай справе праходзяць яшчэ тры чалавекі — ураджэнцы Ліды. Іх абвінавачваюць у дапамаганні ва ўхіленні ад выплаты падаткаў. Расследаванне справы ў дачыненні да іх завершанае.
"Цягам двух гадоў Кучынскі і яго "прадстаўнікі" ажыццяўлялі щгоды па набыцці і адчужэнні лічбавых знакаў (токенаў), электронных грошай за наяўныя і безнаяўныя грашовыя сродкі, а таксама абмену токенаў аднаго віду на іншы", — кажуць у СК. За гэты час было праведзена амаль 8 тысяч аперацый на агульную суму больш за 29 мільёнаў долараў ЗША. У выніку шкода ад нявыплачаных падаткаў склала больш за 9 мільёнаў рублёў.
Паводле версіі следства, сэрвіс Кучынскага выкарыстоўваўся таксама "трэцімі асобамі для здзяйснення ашуканскіх дзеянняў і фінансавання экстрэмісцкай дзейнасці". Вінаватыя прыцягнутыя да адказнасці, кажуць у СК.
Пасля таго як былі затрыманыя яго калегі, Кучынскі працягнуў працу. Адначасова пачаў выводзіць грошы і папярэдзіў кліентаў — расказаў, як паводзіць сябе ў выпадку выкліку ў міліцыю.
Следства паспела арыштаваць толькі 2 мільёны рублёў, якія знаходзіліся на рахунках у Беларусі і Грузіі. Акрамя таго, былі дапытаныя "буйныя кліенты анлайн-сэрвісу, якія ажыццявілі абменныя аперацыі на суму ад 50 000 долараў ЗША і больш".
