Улады хочуць павысіць патрабаванні да лекараў прыватных медцэнтраў

У прыватных медыцынскіх цэнтрах змогуць працаваць толькі спецыялісты першай або вышэйшай катэгорыі — такая норма можа быць замацаваная заканадаўча. Пытанне цяпер абмяркоўваецца. Пра гэта піша агенцтва "Мінск-Навіны" са спасылкай на старшыню Камітэта па ахове здароўя Мінгарвыканкама Ігара Юркевіча.

Чыноўнік тлумачыць неабходнасць прыняцця гэтага рашэння тым, што "адказнасць прыватнага сектара перад пацыентам павінна быць такой жа высокай, як і дзяржаўнага". Між тым цяпер у прыватным сектары можа працаваць малады спецыяліст, які тры гады таму скончыў медуніверсітэт. "Пры гэтым часцяком гэты лекар выконвае хірургічныя ўмяшанні, якія на высокім узроўні здольны рабіць хірург з пяці-сямігадовым стажам працы", — прыводзіць свае аргументы Юркевіч. Аднак, верагодна, у гэтага рашэння ёсць і яшчэ адна прычына, пра якую чыноўнік прамаўчаў. Увядзенне дадатковых патрабаванняў для лекараў медцэнтраў ускладніць пераход туды спецыялістаў з дзяржсектара, а значыць змякчыць праблему вострага дэфіцыту кадраў.

Нагадаем, праз недахоп медыцынскага персаналу з гэтага года ўлады павялічылі колькасць бюджэтных месцаў у медвузах і амаль адмовіліся ад платнай адукацыі па медспецыяльнасцях. Платнікі, нагадаем, не падпадаюць пад размеркаванне і маюць права выбіраць сабе месца працы самі.