Ва ўнутраных войсках прайшлі вучэнні "па знішчэнні незаконных фарміраванняў"

Ва ўнутраных войсках на трэніроўку сабралі вайскоўцаў запасу. Для іх зладзілі вучэнні "па знішчэнні незаконных узброеных фарміраванняў", расказвае БЕЛТА.

Удзельнікі вучэнняў трэніраваліся пераследаваць і захопліваць праціўніка, а таксама адбіваць атаку на населены пункт. Яны стралялі, штурмавалі будынак, вызвалялі закладнікаў, а таксама ладзілі засады на дарозе руху транспарту. Такія трэніроўкі ваеннаабавязаных ва ўнутраных войсках збіраюцца праводзіць і надалей, заявіў намеснік камандуючага ўнутранымі войскамі Сяргей Грабеннікаў. Большасць удзельнікаў, па яго словах, раней праходзіла службу ва ўнутраных войсках. "Мы іх не шукалі, яны не чакалі позвы і прыйшлі самастойна", — сцвярджае Грабеннікаў. Акрамя таго, у гэтых трэніроўках былі задзейнічаныя байцы АМАП, аператыўныя работнікі, байцы сіл спецыяльных аперацый.

Грабеннікаў таксама расказаў БЕЛТА, што ва ўнутраных войсках ужо праводзяцца сумесныя мерапрыемствы з ПВК "Вагнер". Паводле яго слоў, вагнераўцы"з задавальненнем дзеляцца сваім баявым досведам у розных сферах: выкарыстанне БПЛА, снайперскай зброі, сродкаў РЭБ".