Вайна блогерак і самыя папулярныя запыты Google — #ІхНоравы

24-гадовая "clean girl" Сідні Гіфард, у якой 301 тысяча падпісчыкаў у Instagram і каля 500 тысяч у TikTok, абвінаваціла 21-гадовую Алісу Шэйл у эстэтычным шпіянажы, сказаўшы, што яна скрала яе вайб і прысабечыла вобраз. Са слоў інфлюэнсеркі, яна працавала з Шэйл у Тэхасе. Дзяўчаты ўдзельнічалі ў фотасесіях, але пасябраваць не змаглі, а зносіны былі хутчэй "няёмкімі".  

Праз час Гіфард заўважыла, што Шэйл капіюе яе анлайн-вобраз. Карыстальнікі пачалі блытаць акаўнты блогерак.

Галоўная прэтэнзія пазоўніцы палягае ў тым, што праз паводзіны Шэйл у яе ўпалі продажы на Amazon.

Прэзідэнт у шпіталі

79-гадовы прэзідэнт Бразіліі Луіс Інасіу Лула да Сілва аднаўляецца ў аддзяленні інтэнсіўнай тэрапіі пасля кровазліцця ў мозг. Пра гэта паведамляе кіраўніцтва шпіталя ў Сан-Паўлу, дзе ён праходзіць лячэнне.

На аперацыю наважыліся пасля таго, як кіраўнік Бразіліі адчуў востры галаўны боль. На думку дактароў, ён быў выкліканы наступствамі падзення ў кастрычніку. Няшчасны выпадак адбыўся ў яго дома.

Як удакладняюць у шпіталі, Лула, які прыехаў са сталіцы Бразіліі на лячэнне ў Сан-Паўлу, "адчувае сябе добра, знаходзіцца пад наглядам у аддзяленні інтэнсіўнай тэрапіі" пасля таго, як крывацёк быў спынены.

Сам прэзідэнт Бразіліі каментароў пакуль не даваў.