Вяргун стаў галоўным трэнерам мужчынскай баскетбольнай зборнай Беларусі

Расціслаў Вяргун стаў галоўным трэнерам мужчынскай баскетбольнай зборнай Беларусі. Яго кандыдатуру зацвердзіў выканкам Беларускай федэрацыі баскетбола. Вяргун змяніў на гэтай пасадзе Аляксандра Круцікава, які працаваў з 2015 года. Старшыня БФБ Максім Рыжанкоў патлумачыў, што "галоўным паказчыкам працы настаўніка ў любым відзе спорту з'яўляецца вынік", а яго зборная якраз і не дэманстравала — сёлета не змагла прайсці ў асноўны раўнд кваліфікацыі Еўра-2021.

37-гадовага Вяргуна, галоўнага трэнера "Цмокаў-Мінск", Рыжанкоў называе "прадстаўніком новага пакалення трэнераў", які "пастаянна імкнецца да ўдасканалення сваіх прафесійных ведаў і навыкаў". Першым выпрабаваннем для яго будуць матчы кваліфікацыі чэмпіянату свету 2023 года. Па іх выніках будзе прынятае рашэнне "аб мэтазгоднасці працягнення працоўных адносін". У трэнерскі штаб увайшлі Андрэй Крыванос (асістэнт галоўнага трэнера) і польскі спецыяліст Войтэк Валіх (трэнер па агульнай фізпадрыхтоўцы).

Вяргун спадзяецца, што спрычыніцца да пачатку "новай і паспяховай главы ў гісторыі айчыннага мужчынскага баскетбола".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.