Зварот Ціханоўскай да Дня Волі: незалежнасць — гэта калі ты бароніш сваю краіну
"Незалежнасць — гэта калі ты бароніш сваю краіну. І для цябе гэта нават не подзвіг. А проста здаровая рэакцыя на злачынства. Бо іншага выбару няма і не можа быць, калі знішчаюць твой родны дом", — заявіла Святлана Ціханоўская ў сваім звароце да Дня Волі.
Яна згадала, што тэрыторыяй Беларусі карыстаюцца, каб весці чужую вайну: "Выбар для народа незалежнай краіны толькі адзін: прагнаць чужынцаў са сваіх гарадоў".
Па словах Ціханоўскай, каб святкаваць гэты дзень і надалей, трэба вырашыць некалькі задач:
— дабіцца вываду расійскіх войскаў з тэрыторыі Беларусі праз Антываенны Рух;
— пазбавіцца ад дыктатуры і вызваліць палітзняволеных;
— абраць на сумленных выбарах новую дэмакратычную ўладу;
— і пераканацца, што яна будзе пераабраная ў законныя тэрміны.
"І вось тады мы сустрэнем сапраўдны Дзень Волі і зробім яго нацыянальным святам сваёй незалежнасці", — рэзюмуе яна.
25 сакавіка ў Беларусі адзначаецца Дзень Волі. У гэты дзень у 1918 годзе была абвешчаная незалежнасць Беларускай Народнай Рэспублікі — першай беларускай нацыянальнай дзяржавы. Афіцыйныя ўлады гэтую дату ігнаруюць і не дазваляюць святкаваць публічна.
