Мінгарвыканкам не дазволіў фэст “Militar-2013” (дакумент)

“Militar-2013” быў запланаваны на 17 жніўня ў мінскім парку Dreamland. Хэдлайнерам мусіў стаць расійскі industrial-гурт Biopsyhoz. Сярод удзельнікаў — Irdorath, Tim Erna, "Без паники", Hardi M, "Мутнаевока".

У адказ на зварот арганізатараў фэста Мінгарвыканкам паведамляе, што “лічыць немэтазгодным правядзенне згаданага мерапрыемства”. Дакумент падпісаны намеснікам старшыні выканкама.

“Улічваючы шматлікія звароты грамадзянаў з нагоды невыканання гукавога рэжыма падчас правядзення культурна-масавых мерапрыемстваў у дадзеным парку, лічым немэтазгодным правядзенне згаданага мерапрыемства”, — гаворыцца ў дакуменце.

“Слова “забарона” ў гэтай паперы няма, таму мы прынялі яе да ўвагі і працягнулі падрыхтоўку фестываля, — каментуе для Еўрарадыё Дзмітрый Жураўскі, генеральны прадзюсар ТАА “Інструметал трэйд”, якое арганізоўвала “Militar-2013”. — Прадаваліся квіткі, падпісваліся дамовы з гуртамі, планавалася піратэхнічнае шоў. Хачу зазначыць, мы сабралі патрэбныя дазволы ад дзяржаўных установаў, у тым ліку — ад жыллёва-камунальнай гаспадаркі. Нам дазволілі нават салют — што праўда, да пэўнага часу. Але ў дзень, калі былі запушчаныя рэкламныя ролікі “Militar-2013” нам патэлефанавалі і прыгразілі пратаколам за тое, што мы нарушаем забарону. Пасля гэтага ў нас не было іншага выйсця, як згарнуць працы па падрыхтоўцы фэста”.

“Militar-2013” стаў другім на гэтым тыдні фэстам альтэрнатыўнай музыкі, адмененым у Беларусі. Першы — “ROCKachev” у Рагачове — не адбудзецца, бо ад яго адначасова адмовіліся ўсе дзяржаўныя партнёры.

Крыху раней, таксама спасылаючыся на звароты грамадзянаў, Мінгарвыканкам прыбраў альтэрнатыўную музыку з мінскай пешаходнай вуліцы Карла Маркса.