"Дынама" зможа ездзіць у ЕС, але ці дазволяць гуляць у еўракубку - нявядома

120403 Eurafokus.mp3

“Шчыра кажучы, гэта рашэнне Савета Еўропы. Лепш вам звярнуцца да іх. Дагэтуль мы не маем ніякай інфармацыі, як гэта паўплывае на спаборніцтвы УЕФА”, – распавядаюць Еўрарадыё ў прэс-службе Еўрапейскай федэрацыі футбола.

Звяртаемся ў прэс-службу вярхоўнага прадстаўніка па замежных справах і палітыцы бяспекі ЕС Кэтрын Эштан.

“Клуб быў дададзены ў спіс падчас яго апошняга пашырэння, –тлумачыць прэс-сакратар еўракамісара Мая Качыянчыч. – І так як клуб у гэтым спісе, яго актывы ў ЕС, калі такія ёсць, будуць замарожаныя. І яны не могуць займацца бізнесам. Яны не могуць заключаць кантракты з еўрапейскімі фірмамі”.

Ці паўплываюць санкцыі на магчымы ўдзел “Дынама” ў еўракубках, там не ведаюць. Мая Качыянчыч кажа толькі, што футбалісты ў “чорны спіс” не ўваходзяць.

Раней прэс-сакратар “Дынама” Алег Сабалеўскі распавядаў Еўрарадыё, што клуб папрасіў Беларускую федэрацыю футбола звярнуцца ва УЕФА па тлумачэнні. Прайшоў тыдзень…

Алег Сабалеўскі: “Пакуль няма ніякіх навінаў. Інфармацыя тая ж, што была і тыдзень таму”.

Тым часам у міжнародна-прававым дэпартаменце федэрацыі футбола таксама няма ніякіх навінаў адносна “Дынама”.

Міжнародна-прававы дэпартамент БФФ: “Пакуль ніякіх навінаў. Федэрацыя гэтым займаецца. Ідзе нейкі працэс кансультацый і перамоваў. Разумееце, пакуль няма тэмы для размовы. Раптам яны выйдуць у еўракубкі ці не выйдуць. Гэта яшчэ настолькі несур’ёзна”.

Застаецца невядомым, ці распаўсюджваюцца санкцыі на ўдзел каманды ў Лізе Еўропы. У якой “дынамаўцы” павінны гуляць, калі кубак краіны па футболе дастанецца “Гомелю”. А таксама незразумела, у чым мінскія футбалісты паедуць у Еўропу. Бо калі санкцыі пачнуць працаваць, мінскі клуб рызыкуе пазбавіцца нямецкай формы “Saller”, у якую футбалісты “Дынама” апранаюцца з 2008-га года. Або давядзецца перакупляць майкі і шорты ў пасярэднікаў.

Фота: dinamo-minsk.by