Расія можа спыніць пастаўкі электраэнергіі ў Беларусь з-за запазычанасці
"Інтэр РАО" спадзяецца атрымаць грошы ад Беларусі сёння, іначай з 9 чэрвеня пачнуцца абмежаванні ў пастаўках электраэнэргіі.
Расійскі экспарцёр электраэнергіі "Інтэр РАО" заявіў, што Беларусь запазычылася за пастаўленую ў сакавіку-красавіку электраэнергію. Пра гэта РІА "Новости" паведаміў афіцыйны прадстаўнік кампаніі Антон Назараў.
Іншая, неафіцыйная крыніца ў расійскай кампаніі паведаміла журналістам, што Беларусь завінавацілася каля 54 млн долараў. "Інтэр РАО" паведаміла беларускаму боку, што з 23 гадзінаў беларускага часу 8 чэрвеня плануе зменшыць аб'ём электраэнергіі на 200 Мвт. Гэтага не адбудзецца толькі ў выпадку сённяшняй аплаты запазычанасці.
Расійская газета "Коммерсант", у сваю чаргу, напісала, што абмежаванне паставак электраэнэргіі будзе доўжыцца 10 дзён. Пасля 19 чэрвеня пастаўкі могуць быць зусім прыпыненыя, калі не атрымаецца дамовіцца наконт пагашэння запазычанасці.
