"Улады асцерагаюцца, што не могуць гэта кантраляваць"

Еўрарадыё: Будуць людзі збірацца далей, без патрабаванняў, а ўлада на гэта не будзе рэагаваць. Які сэнс? І што далей?

Вячаслаў Дыянаў: Нашая задача — вывесці на вуліцу ўсіх незадаволеных. Патрабаванне адно: адстаўка Лукашэнкі. Улада баіцца дынамікі, таго, што людзі прыходзяць без сцягоў, лозунгаў і лідараў. Такога ніколі не было, каб пратэстныя людзі прыходзілі без сцягоў і г.д. Яны не кідаюцца на міліцыю. Гэта новы від негвалтоўнага супраціву. Таксама асцерагаюцца, што працэс гэты ім кантраляваць вельмі складана. І тое, што дабрацца да тых людзей, якія кантралююць гэты працэс, яны не могуць. І яшчэ вельмі важная небяспека ў тым, што людзі збіраюцца ў розных гарадах у адзін час і іх становіцца з кожным разам усё болей.

Еўрарадыё: У сеціве з'явіліся прафесійныя рэкламныя ролікі, даволі высокай якасці. Хто дапамагае іх здымаць?

Вячаслаў Дыянаў: Насамрэч нам проста іх дасылаюць карыстальнікі. Мы асабіста да іх ніякага дачынення не маем. Цяпер такая хваля ідзе. Мы проста гаворым "дзякуй". Я нават не ведаю, што за чалавек рабіў гэты ролік.

Еўрарадыё: Дык а чым жа тады займаецца каманда?

Вячаслаў Дыянаў: Тактыкай на плошчы і прасоўваннем праз сацыяльныя сеткі.

Еўрарадыё: Для вас гэта гульня або сур'ёзная палітыка?

Вячаслаў Дыянаў: Мы разумеем, што адказваем за людзей, за кантакты з грамадзянскай супольнасцю, з арганізацыямі, і працуем па 18 гадзін на суткі. Я не думаю, што гэта гульня, калі мы працуем па 18 гадзін.

Еўрарадыё: Уся каманда знаходзіцца ў бяспецы за межамі Беларусі. Як жа тады прапрацоўваецца тактыка, калі нікога з каманды на плошчы няма?

Вячаслаў Дыянаў: На плошчы ёсць людзі, якія нам дапамагаюць і паведамляюць ўсю патрэбную інфармацыю.

Еўрарадыё: Мабыць, мусіць быць чалавек на месцы, які неяк кантралюе сітуацыю, дапамагаючы пазбегнуць правакацый? Ці не не баіцеся падставіць людзей?

Вячаслаў Дыянаў: Мы далі поўную інфармацыю, як сябе уберагчы. Веды — гэта сіла. Калі да нас прыходзіць новая інфармацыя, мы намагаемся максімальна каардынаваць людзей праз інтэрнэт. Калі з'явіцца нейкі лідар на плошчы, яго адразу забяруць. У гэтым няма ніякага сэнсу. Інтэрнэт з'яўляецца ў гэтым выпадку прамым каардынатарам.

Мы напісалі стратэгію, як пазбегнуць "хапуна" і рабіць усё, каб яго проста не было. Трэба проста не ісці на перашкоды, на кардоны, металадэтэктары. Трэба быць у 5 метрах, адыходзіць ад кардона. Не праходзіць праз рамы металадэтэктараў. Інакш улада адсячэ самых актыўных і зладзіць "хапун".

Еўрарадыё: Вы за мяжой, а людзей у Беларусі заклікаеце кудысьці прыходзіць. Ці не папракаюць вас гэтым?

Вячаслаў Дыянаў: У нас быў адміністратар, не за мяжой. У выніку яму давялося з'ехаць. Яго забралі на 3 сутак, потым выклікала Генпракуратура. Таму мы прынялі рашэнне, што яму трэба з'ехаць. Завуць яго Дзмітрый Няфёдаў, пра яго шмат пісалі. Мы б з задавальненнем знаходзіліся на тэрыторыі Беларусі, каб былі ўпэўненыя, што як толькі прыедзем, нас не пасадзяць за краты і не выдаляць ўсю інфармацыю ў інтэрнэце.

Еўрарадыё: Як вы ставіцеся да чутак пра тое, што закрыюць "ВКонтакте", каб спыніць гэтыя акцыі?

Вячаслаў Дыянаў: Я мяркую, што гэта не проста чуткі, а адмысловая дэзінфармацыя. Тыя, хто распускаюць яе, не разумеюць, што калі "ВКонтакте" закрыюць, то тыя, хто раней не ўдзельнічаў у гэтых акцыях, яны выйдуць туды. Падзеі ў Егіпце — не лепшы прыклад, але там калі закрылі Facebook, тады ўсё і адбылося. Карыстальнікаў "ВКонтакте" ў працэнтных суадносінах нават больш, чым было там.

Еўрарадыё: А чым адрозніваецца тое, што адбываецца ў Беларусі, ад падзеяў на Блізкім Усходзе?

Вячаслаў Дыянаў: Усё кардынальна па-іншаму. Там інтэрнэт іграў ролю мабілізацыі. Ён не казаў, куды ісці, там былі лідары, актывісты. Яны запускалі гэты працэс, а інтэрнэт быў рэтранслятарам. У нас усё наадварот. Калі там не інтэрнэт быў крыніцай, то ў нас ён з'яўляецца крыніцай выхаду людзей на вуліцу. У такіх маштабах такога ў свеце яшчэ не было.

Еўрарадыё: Гэтыя акцыі пачаліся пасля выбараў. Чаму не з'явілася ідэя праводзіць падобныя акцыі раней?

Вячаслаў Дыянаў: На выбарах гэта складана, бо хтосьці з кандыдатаў паспрабаваў бы зрабіць сабе піяр на гэтым. Тады людзі сумняваліся: мабыць, Лукашэнка не такі дрэнны, мабыць, пойдзе на саступкі. Праз крызіс з'явілася праслойка, якая не асацыюе сябе з апазіцыяй, але мае выразнае жаданне памяняць ўладу. Плюс тады не былі такімі актыўнымі сацыяльныя сеткі. Да выбараў гэта было немагчыма, хаця б толькі таму, што хтосьці мог выкарыстаць гэта як свой піяр.

Еўрарадыё: Як вы ставіцеся да таго, што палітыкі далучаюцца да акцый?

Вячаслаў Дыянаў: Мы не супраць, каб палітыкі прыходзілі на акцыі, нам патрэбныя ўсе. Але мы заклікаем іх туды прыходзіць як грамадзянаў і быць, як усе грамадзяне, разам. Намагацца адмовіцца ад інтэрв'ю, каб не збіраць вакол сябе натоўп журналістаў, і проста адказваць, што я тут як звычайны грамадзянін. Такая стратэгія прывядзе да перамогі.

Еўрарадыё: Мабыць, некаторыя людзі прыходзяць не праз палітычныя погляды, а па прыколе?

Вячаслаў Дыянаў: У кожным жарце ёсць доля жарту. Людзі дзякуючы ўладзе ведаюць, што гэта за акцыя. Ён разумее, што, мабыць, я па прыколе іду, але я супраць. Тут пытанне не ў палітыцы. Тут канкрэтны адказ: так або не, супраць або не. Яны не могуць хадзіць выключна па прыколе. На пытанне "Вы хочаце, каб Лукашэнка сышоў?" я ўпэўнены, што ўсе адкажуць: "Так".

Еўрарадыё: Чым вы займаліся раней?

Вячаслаў Дыянаў: Працавалі ў кампаніі "Грамадзянін". Былі акцыі 500 заявак, калі мы напружвалі раённыя адміністрацыі, разносілі позвы сябрам выбарчых камісій. Ярмошына тады сказала, што ніколі такога ціску не было, каб позвы прыходзілі масава на 20 чысло. Падчас выбараў працаваў у камандзе Раманчука. Калі нейкае расчараванне і было ў той момант, то цяпер мая стратэгія крыху памянялася да любога прадстаўніка апазіцыі. Цяпер у нас ёсць шанец у кожнага адмыцца ад любога бруду за адзін дзень. Дрэннае ўсе забудуць, калі чалавек зараз у самы патрэбны момант праявіць сябе як герой.

Кіраўнік службы грамадскіх сувязяў ГУУС Мінгарвыканкама Аляксандр Ластоўскі патлумачыў Еўрарадыё, што збор на плошчы па-ранейшаму не быў узаконены і застаецца нелегальны...

"... што прымушае органы ўнутраных справаў адэкватна рэагаваць на правядзенне падобных мерапрыемстваў. Нічога новага, усё па-ранейшаму. Заканадаўства не дае нам права дапускаць правядзенне якіх-небудзь несанкцыянаваных мерапрыемстваў. Гэта не барацьба з іншадумствам, мы выконваем сваю працу. Мы абавязаныя ахоўваць закон, мы яго ахоўваем".

Як менавіта будзе забяспечвацца правапарадак, Ластоўскі не ўдакладніў, але адзначыў, што ўсё будзе вельмі карэктна ў межах паўнамоцтваў міліцыі.