У Літве затрымалі начальніка Следчага камітэта па Мінску — знайшлі патроны
Дзмітрый Канаплянік быў у адпачынку і выязджаў у суседнюю краіну з жонкай па асабістых справах.
Як паведамляе партал tut.by, здарэнне адбылося ўвечары 21 верасня на літоўска-беларускай мяжы. На кантрольна-прапускным пункце ў Мядзінінкай падчас праверкі аўтамабіля Honda CR-V, зарэгістраванага ў Беларусі, знайшлі некалькі дзясяткаў патронаў калібру 9 мм Luger.
На гэтым аўтамабілі пасля прыватнай паездкі па Літве ў Беларусь вярталіся муж і жонка сярэдніх гадоў — грамадзяне нашай краіны. Было распачатае расследаванне для высвятлення ўсіх абставінаў здарэння, мужчыну і жанчыну затрымалі. Літоўская пракуратура не называе месца працы кіроўцы. Аднак tut.by атрымаў інфармацыю, што гэта — Дзмітрый Канаплянік, начальнік упраўлення Следчага камітэта па Мінску.
Фота — tut.by, kp.by
