Аднаўляць інфраструктуру пасля абстрэлаў Украіне дапамагаюць ужо 12 краін

Аднаўляць энергетычную інфраструктуру пасля расійскіх абстрэлаў Украіне дапамагаюць ужо 12 краін. Пра гэта ў панядзелак заявіў кіраўнік украінскага МЗС Дзмітро Кулеба. Дамоўленасці аб пастаўках абсталявання ўжо дасягнутыя з Ізраілем, Іспаніяй, Італіяй, Літвой, Германіяй, Паўночнай Македоніяй, Польшчай, Паўднёвай Карэяй, Славакіяй, Славеніяй, Фінляндыяй і Францыяй. Агулам гаворка ідзе пра амаль тысячу адзінак энергетычнага абсталявання. Першыя партыі дапамогі ўжо ва Украіне, іншыя пастаўкі чакаюцца ў бліжэйшы час, піша eurointegration.com.ua.

"Мы працягваем працаваць над павелічэннем кола партнёраў і аб'ёмаў падтрымкі", — кажа Кулеба.

Дамоўленасці былі дасягнутыя як на ўзроўні ўрадаў, так і наўпрост з кампаніямі-вытворцамі тэхнікі. Гаворка ідзе аб генератарах розных тыпаў, цеплавых гарматах і іншым абсталяванні.

"Мы не дазволім расійскага тэрору зламаць нас або нашых партнёраў, — працягвае ўкраінскі міністр. — Мы ўдзячныя кожнаму партнёру і кожнай кампаніі, якія адгукнулася на наш тэрміновы запыт".

31 кастрычніка па Украіне была нанесена чарговая маштабная ракетная атака Расіі. Пацярпела сталіца. На вечар панядзелка ў Кіеве цалкам адноўлена электразабеспячэнне для 350 тысяч сем'яў і аб'ектаў водаканала, якія засталіся без святла з-за ранішняга абстрэлу. Але 40% жыхароў сталіцы ўсё яшчэ застаюцца без вады. Пра гэта паведаміў мэр Віталь Клічко.