Цяпер Беларусь належыць да "вялікай Еўразіі", заявіў на Мальце прадстаўнік МЗС
Юрый Амбразевіч прамаўляе на Мальце / mfa.gov.by
На сустрэчы Савета міністраў замежных спраў АБСЕ на Мальце выступіў намеснік міністра замежных спраў Беларусі Юрый Амбразевіч. Яго прамова запомнілася заявай, што будучыня нашага кантынента — "у рамках еўразійскай бяспекі". Ён пералічыў арганізацыі, у якія ўваходзіць РБ — АДКБ, ЕАЭС, СНД, ШАС.
"Так, цяпер і Беларусь, і амаль усе мы ў гэтай зале належым да адной вельмі важнай і недаацэненай пакуль яшчэ на захад ад Вены прасторы — да вялікай Еўразіі!", — урачыста аб'явіў прадстаўнік МЗС. Ён нагадаў, што менавіта Беларусь "надзейна абслугоўвае самую загружаную і важную артэрыю найдаўжэйшага наземнага транзітнага шляху з Кітая ў Заходнюю Еўропу". Але прамаўчаў наконт праблем, якія ўзнікаюць з гэтым транзітам з-за палітыкі рэжыму Лукашэнкі. Аднак згадаў санкцыі ЗША і ЕС, якія нібыта не дзейнічаюць з-за падтрымкі "саюзнай Расіі" і "стратэгічнага партнёра Кітая" (не дзіўна, што ў Літве занепакоіліся ростам уплыву КНР у РБ).
Юрый Амбразевіч сказаў, што Беларусь "усё яшчэ бачыць у АБСЕ інструмент для гарантавання бяспекі ў Еўропе".
