Дзяўчынка, якую 4 дні шукалі ў Гродзенскай вобласці, загінула
![Арыентыроўка ПВА "Анёл" на Лізавету Дзям'яненка](/sites/default/files/styles/main_image_watermark_/public/2023-08/dem1706.jpg.webp?itok=7qvx7Fnm)
Арыентыроўка ПВА "Анёл" на Лізавету Дзям'яненка
Пошукава-выратавальны атрад "Анёл" паведамляе, што пошукі 12-гадовай Лізаветы Дзям'яненка з Дзятлава скончыліся. Дзяўчынку знайшлі загінулай.
Пра тое, што дзіця знікла, стала вядома раніцай 14 чэрвеня. У гэты дзень у міліцыю звярнулася выхавацелька сацыяльна-педагагічнага цэнтра, адкуль напярэдадні каля 19:00 сыйшла дзяўчынка. Міліцыя размясціла арыенціроўку. Да пошукаў далучыліся работнікі МНС і іншых службаў.
Дзяўчынку шукалі ў лесе каля вёскі Погіры Дзятлаўскага раёна.
Лізавета часова жыла ў прытулку таму, што яе прыёмная маці паехала ў Гродна на курсы павышэння кваліфікацыі прыёмных бацькоў. Біялагічныя маці і бацька Лізаветы былі пазбаўленыя бацькоўскіх правоў.
Пры якіх абставінах Лізавета загінула і дзе менавіта знайшлі цела, у пошукавым атрадзе не паведамляюць. У пошуках, якія працягваліся тры дні, бралі ўдзел добраахвотнікі ПВА "Анёл" з Брэсцкага рэгіёна, 6 кіналагічных разлікаў ПВА "Анёл" з Мінска і Мінскай вобласці, супрацоўнікі міліцыі і МНС, мясцовыя жыхары, кіналагічны разлік ПВА "Паўднёвы захад".
Атрад выказвае шчырыя спачуванні родным і блізкім Лізаветы. Еўрарадыё далучаецца да спачуванняў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.